ការជួបប្រកួតតទល់កីឡាករលំដាប់ពិភពលោកក្នុងព្រឹត្តិការណ៍កីឡាអាស៊ី (Asian Games) លើកទី២០ នាក្រុង Nagoya ប្រទេសជប៉ុន ឆ្នាំ២០២៦ នេះ ត្រូវបានសហព័ន្ធកីឡាប្រដាល់សកលកម្ពុជា ចាត់ទុកជាឱកាសមាសដ៏សំខាន់ក្នុងការវាស់ស្ទង់ និងអភិវឌ្ឍសមត្ថភាពបច្ចេកទេសឱ្យកាន់តែខ្លាំងក្លា។
ឯកឧត្ដម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា បានគូសបញ្ជាក់ថា គោលដៅយុទ្ធសាស្ត្ររបស់សហព័ន្ធមិនមែនបញ្ចប់ត្រឹម Asian Games នោះទេ ប៉ុន្តែជាជំហានវាស់ស្ទង់សមត្ថភាព ដើម្បីត្រៀមខ្លួនប្រជែងក្នុងវគ្គជម្រុះឆ្ពោះទៅព្រឹត្តិការណ៍កីឡាអូឡាំពិករដូវក្ដៅ ឆ្នាំ២០២៨ នៅក្រុង Los Angeles សហរដ្ឋអាមេរិក នាឆ្នាំ២០២៧ ខាងមុខ។
ឯកឧត្ដម ប៊ុយ សុភ័ណ្ឌ មានប្រសាសន៍ថា៖ «ទោះបីជាយើងត្រូវជួបកីឡាករលំដាប់ពិភពលោកនៅ Asian Games 2026 ក៏ដោយ ប៉ុន្តែវាជាឱកាសដ៏ល្អក្នុងការបង្កើនសមត្ថភាពបច្ចេកទេស។ គោលដៅធំរបស់យើងគឺការត្រៀមកីឡាករសម្រាប់វគ្គជម្រុះ Olympic LA 2028 នាឆ្នាំ២០២៧។ ទាំងសហព័ន្ធ និងកីឡាករ នឹងខិតខំប្រឹងប្រែងឱ្យអស់ពីលទ្ធភាព»។
ប្រមុខសហព័ន្ធរូបនេះបានបន្ថែមថា ប្រទេសខ្លាំងៗផ្នែកប្រដាល់សកលក្នុងព្រឹត្តិការណ៍ Asian Games រួមមាន អ៊ូបេគីស្ថាន និងកាហ្សាក់ស្ថាន ដែលសុទ្ធតែធ្លាប់គ្រងមេដាយយ៉ាងច្រើនពីព្រឹត្តិការណ៍ Olympic 2024 នៅរដ្ឋធានីប៉ារីស។
សូមបញ្ជាក់ថា កីឡាករប្រដាល់សកលឆ្នើមជម្រើសជាតិកម្ពុជា២រូប នឹងត្រូវចេញបេសកកម្មនៅក្រុង Nagoya ប្រទេសជប៉ុន នាខែកញ្ញា ខាងមុខ រួមមាន កីឡាករ វី សុភ័ស្ស (ប្រកួតប្រភេទទម្ងន់ ៧០គីឡូក្រាម) និងកីឡាករ Anvar Nasredinov (ប្រកួតប្រភេទទម្ងន់ ៨០គីឡូក្រាម)៕
