អង្គការកម្ពុជាអូស្ត្រាលីបាល់ទាត់រីករាយ (HFCA) និងអង្គការមូលនិធិកុមារកម្ពុជា (CCF) បានប្រកាសជាផ្លូវការអំពីការចុះអនុស្សរណៈនៃការយោគយល់គ្នា (MoU) ថ្មីមួយ ដើម្បីបន្តភាពជាដៃគូយុទ្ធសាស្ត្ររបស់ខ្លួនរហូតដល់ឆ្នាំ ២០២៩ ក្នុងគោលបំណងអភិវឌ្ឍយុវជនខ្វះឱកាសនៅកម្ពុជាតាមរយៈវិស័យកីឡា និងការអប់រំ។
កិច្ចព្រមព្រៀងថ្មីនេះជាការបន្តពង្រឹងកិច្ចសហប្រតិបត្តិការ ដែលបានចាប់ផ្តើមតាំងពីឆ្នាំ ២០០៩ មក ហើយនឹងជំរុញឱ្យទំនាក់ទំនងរវាងស្ថាប័នទាំងពីរឈានដល់រយៈពេល ២០ ឆ្នាំពេញនៅពេលបញ្ចប់អាណត្តិ MoU នេះ។
តាមរយៈកិច្ចសហការកន្លងមក អង្គការទាំងពីរមិនត្រឹមតែបានផ្តល់ការហ្វឹកហ្វឺនបាល់ទាត់ប្រកបដោយគុណភាព សុខុមាលភាព និងការអភិវឌ្ឍជំនាញទន់ប៉ុណ្ណោះទេ ប៉ុន្តែថែមទាំងបានបើកឱកាសឱ្យយុវជនខ្វះឱកាសជាច្រើនរូប បានធ្វើដំណើរទៅប្រកួតកីឡាបាល់ទាត់នៅក្រៅប្រទេសជាច្រើនរួមមាន ប្រទេសប្រេស៊ីល បារាំង ម៉ិកស៊ិក ប៉ូឡូញ ឈីលី ហូឡង់ ស្កុតឡែន ន័រវែស វ៉ែលស៍ កូរ៉េខាងត្បូង និងសិង្ហបុរី ដើម្បីទទួលបានបទពិសោធផ្លាស់ប្តូរជីវិតក្នុងផ្លូវវិជ្ជមាន។
លោក Scott Neeson ស្ថាបនិក និងជាប្រធានអង្គការ CCF (អតីតប្រធានក្រុមហ៊ុន 20th Century Fox International ដែលបានលះបង់អាជីពនៅហូលីវូដមកជួយកុមារក្រីក្រនៅកម្ពុជា) បានលើកឡើងថា៖ «អង្គការ HFCA គឺជាដៃគូដ៏លេចធ្លោមួយចំពោះអង្គការ CCF ដែលបានធ្វើឱ្យជីវិតកុមាររបស់យើងកាន់តែប្រសើរឡើងតាមរយៈវិស័យបាល់ទាត់អស់រយៈពេល ១៧ ឆ្នាំមកហើយ។ កម្មវិធីរបស់ពួកគេមិនត្រឹមតែផ្ដល់នូវភាពរីករាយក្នុងការលេងបែបប្រកួតប្រជែងប៉ុណ្ណោះទេ ប៉ុន្តែថែមទាំងផ្តល់ឱកាសក្នុងការចូលរួមក្នុងព្រឹត្តិការណ៍កីឡាអន្តរជាតិ ដែលបើកទ្វារទៅរកឱកាស និងបទពិសោធថ្មីៗ»។
ជាមួយគ្នានេះ លោក Paraic Grogan ស្ថាបនិកអង្គការ HFCA បានថ្លែងថា៖ «ការងាររបស់អង្គការ CCF ជាមួយយុវជនខ្វះឱកាសនៅតំបន់ស្ទឹងមានជ័យ ក្នុងរាជធានីភ្នំពេញ គឺជាការបំផុសគំនិតដ៏អស្ចារ្យសម្រាប់អ្នករាល់គ្នានៅអង្គការ HFCA ហើយយើងមានកិត្តិយសណាស់ក្នុងការបន្តដំណើរនេះជាមួយពួកគេ»។
គួររំឭកថា អង្គការ HFCA ត្រូវបានបង្កើតឡើងក្នុងឆ្នាំ ២០០៥ ក្នុងគោលបំណងលើកកម្ពស់សមត្ថភាពយុវជនខ្វះឱកាសតាមរយៈកីឡាបាល់ទាត់ ចំណែកឯអង្គការ CCF បាន និងកំពុងប្រតិបត្តិការនៅក្នុងតំបន់ស្ទឹងមានជ័យអស់រយៈពេលជាង ២២ ឆ្នាំមកហើយ ដោយបច្ចុប្បន្នមានកុមារជាង ១,៨០០ នាក់ កំពុងទទួលបានការគាំទ្រផ្នែកការអប់រំ និងសុខុមាលភាព៕
