ស្វាយរៀង៖ ពិធីក្រុងពាលីបញ្ចុះបឋមសិលាសាងសង់ពហុកីឡដ្ឋានថ្មីរបស់ខេត្តស្វាយរៀង ត្រូវ បានរៀបចំឡើងកាលពីថ្ងៃទី១៧ ខែសីហា ឆ្នាំ២០២៦ នៅទីតាំងស្ថិតក្នុងភូមិស្រប់ជ្រុំ សង្កាត់ សង្ស័រ ក្រុងស្វាយរៀង ក្រោមអធិបតីភាព ឯកឧត្តម ប៉េង ពោធិ៍សា អភិបាលខេត្តស្វាយរៀង និងឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា។
ការចាប់ផ្តើមសាងសង់ពហុកីឡដ្ឋានថ្មីនេះ ត្រូវបានចាត់ទុកជាសមិទ្ធផលដ៏សំខាន់ និងជា ប្រវត្តិសាស្ត្រថ្មីមួយទៀតសម្រាប់ខេត្តស្វាយរៀង ក្នុងការរួមចំណែកលើកកម្ពស់ និងអភិវឌ្ឍ វិស័យកីឡាឱ្យកាន់តែមានភាពរីកចម្រើន ព្រមទាំងឆ្លើយតបទៅនឹងតម្រូវការជាក់ស្តែងរបស់ ប្រជាពលរដ្ឋ និងអត្តពលិកក្នុងមូលដ្ឋាន។
ពហុកីឡដ្ឋាននេះ នឹងមិនត្រឹមតែផ្តល់ទីតាំងសម្រាប់ការហ្វឹកហាត់ និងរៀបចំការប្រកួតកីឡា នានា ទាំងក្នុងកម្រិតខេត្ត និងថ្នាក់ជាតិប៉ុណ្ណោះទេ ប៉ុន្តែថែមទាំងជាទីកន្លែងសម្រាប់ប្រជា ពលរដ្ឋចូលរួមហាត់ប្រាណ លើកកម្ពស់សុខភាព និងប្រើប្រាស់ជាកន្លែងកម្សាន្តសាធារណៈ ផងដែរ។
យោងតាមគម្រោងបច្ចេកទេស ពហុកីឡដ្ឋានថ្មីនេះ នឹងត្រូវបានសាងសង់ឡើងដោយ អនុលោមតាមស្តង់ដារបច្ចេកទេសសមស្រប ដោយផ្តោតលើគុណភាព សុវត្ថិភាព និង សោភ័ណភាព ដើម្បីធានាឱ្យទីតាំងកីឡានេះអាចបំពេញតម្រូវការប្រើប្រាស់បានប្រកបដោយ ប្រសិទ្ធភាព និងមាននិរន្តរភាព។
ការសាងសង់ពហុកីឡដ្ឋានថ្មីនេះ ក៏ជាការបង្ហាញពីការយកចិត្តទុកដាក់របស់រដ្ឋបាលខេត្ត ស្វាយរៀង និងភាគីពាក់ព័ន្ធ ក្នុងការបង្កើនហេដ្ឋារចនាសម្ព័ន្ធកីឡា និងបង្កើតបរិយាកាស អំណោយផលសម្រាប់ការអភិវឌ្ឍធនធានកីឡា ព្រមទាំងជំរុញឱ្យប្រជាពលរដ្ឋកាន់តែចូលរួម ក្នុងសកម្មភាពកីឡា និងលំហាត់ប្រាណ ដើម្បីសុខភាព និងសុខុមាលភាពកាន់តែល្អប្រសើរ៕
