ចំណូលពីការចាយវាយរបស់អ្នកចូលរួមទិវាម៉ារ៉ាតុងអន្តរជាតិចក្រភពអង្គរ ឆ្នាំ២០២៦ មានមិនតិចជាងកន្លះលានដុល្លារអាមេរិកទេ។ នេះបើប្រសាសន៍ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា។
ព្រឹត្តិការណ៍រត់ប្រណាំងជាលក្ខណៈអន្តរជាតិដ៏ពិសេសនៅខេត្តសៀមរាបនេះមានអ្នកចូលរួមទាំងជាតិ និងអន្តរជាតិប្រមាណ៦៥០០នាក់ ហើយក្នុងនោះក្រៅពីជនបរទេសផ្សេងៗ ក៏មានអ្នករត់ជាតិចិនយ៉ាងច្រើនដែលបានធ្វើដំណើរមកចូលរួម។ ហេតុដូចនេះហើយ ពួកគេត្រូវចំណាយទាំងការហូបចុក និងស្នាក់នៅ ដែលថវិកាទាំងអស់នេះបានចាក់ចូលដល់សេដ្ឋកិច្ចជាតិ។
ឯកឧត្ដមអគ្គលេខាធិការ NOCC មានប្រសាសន៍បែបនេះ “៖ ជាផលចំណេញដល់ការរៀបចំនេះ គឺក្នុងចំណោម៦៥០០នាក់ យើងគិតថាត្រឹម៦០០០នាក់ចុះ ចាយមួយថ្ងៃតែ៥០ដុល្លារ វាស្មើ៣០ម៉ឺនដុល្លារ ហើយបើគិត៣ថ្ងៃវា៩០ម៉ឺនដុល្លារ។ អ៊ីចឹងវាមិនតិចជាងកន្លះលានដុល្លារទេដែលបានចាក់ចូលសេដ្ឋកិច្ចជាតិពីព្រឹត្តិការណ៍ម៉ារ៉ាតុងនេះ។ ដោយឡែកសម្រាប់ជនជាតិចិនវិញ អាចនឹងស្នាក់នៅយូរ អាច៣ទៅ៤ថ្ងៃ។ ដូច្នេះចរន្តសេដ្ឋកិច្ចរបស់យើងក៏មានការកើនឡើងល្អដែរ។ យើងឃើញថា អ្នកលក់នៅសៀមរាបប៉ុន្មានថ្ងៃនេះសប្បាយចិត្ត ហើយខាងកន្លែងស្នាក់នៅអីក៏សប្បាយចិត្ត ប្រតិបត្តិករទាំងអស់ ទាំងអាជីវកម្មតូចតាចអីក៏សប្បាយចិត្តទាំងអស់គ្នា។ នេះជាគោលដៅចក្ខុវិស័យរបស់រាជរដ្ឋាភិបាលក្រោមការដឹកនាំរបស់សម្ដេចមហាបវរធិបតី នាយករដ្ឋមន្ត្រីដែលតែងតែជំរុញ និងលើកទឹកចិត្តឱ្យទេសចរណ៍ពាក់ព័ន្ធនឹងវប្បធម៌ទៅផ្សារភ្ជាប់ជាមួយប្រជាជន និងទេសចរបរទេសឱ្យបានសុខដុមរមនា។”
ទិវាម៉ារ៉ាតុងអន្តរជាតិចក្រភពអង្គរ ឆ្នាំ២០២៦ បានប្រព្រឹត្តទៅនៅថ្ងៃអាទិត្យ ទី២ ខែសីហា ដោយមានការចូលរួមសរុប៦៥០០នាក់ កើនឡើង ២៥% ធៀបនឹងឆ្នាំ២០២៥។ ក្នុងនោះអ្នករត់ជនជាតិខ្មែរចំនួន៥៤៥០នាក់ និងអន្តរជាតិចំនួន ១០៥០នាក់មកពី៥១ប្រទេស។ ទន្ទឹមនឹងនេះ ព្រឹត្តិការណ៍ដ៏ពិសេសក៏មានកិច្ចសហប្រតិបត្តិការរវាង NOCC ជាមួយកិច្ចសហប្រតិបត្តិការមេគង្គ-ឡានឆាង និងព្រឹត្តិការណ៍តាលីម៉ារ៉ាតុង ដោយមានការគាំទ្រពីស្ថានទូតចិនប្រចាំនៅកម្ពុជា៕
