សហព័ន្ធកីឡាបាល់ទាត់លើតុកម្ពុជាបានធ្វើមហាសន្និបាតបញ្ចប់អាណត្តិចាស់របស់ខ្លួននៅរសៀលថ្ងៃចន្ទ ទី២៧ ខែកក្កដា ឆ្នាំ២០២៦ នេះដើម្បីបន្តអាណត្តិថ្មី ២០២៦/២០៣០ នាស្នាក់ការគណៈកម្មាធិការជាតិអូឡាំពិកកម្ពុជា។
ក្នុងអាណត្តិថ្មីអ្វីដែលជាទិសដៅចម្បងមួយរបស់សហព័ន្ធនោះ គឺស្វែងរកវិទ្យាល័យណាមួយធ្វើជាវិទ្យាល័យឈានមុខក្នុងការរៀបចំឱ្យមានកីឡាបាល់ទាត់លើតុ មុននឹងបញ្ជ្រាបទៅកាន់គ្រឹះស្ថានអប់រំជាបន្តបន្ទាប់ទៀត។ នេះជាប្រសាសន៍របស់ឯកឧត្ដម វ៉ាត់ ចំរើន ប្រធានសហព័ន្ធកីឡាបាល់ទាត់លើតុកម្ពុជា។
ឯកឧត្ដម វ៉ាត់ ចំរើន មានប្រសាសន៍បែបនេះ “៖ ទិសដៅមួយទៀត គឺបញ្ជ្រាបទៅតាមសាលារៀន ដែលជាទិសដៅសំខាន់។ អ៊ីចឹងក្នុងអាណត្តិថ្មីនេះ យើងនឹងរកវិទ្យាល័យណាមួយ ធ្វើជាវិទ្យាល័យឈានមុខក្នុងការរៀបចំឱ្យមានកីឡាបាល់ទាត់លើតុ។ នេះជាយុទ្ធសាស្ត្រមួយក្នុងការពង្រីកសក្ដានុពលកីឡាបាល់ទាត់លើតុ និងជាផែនការគំរូមួយទៅ ចាំយើងបន្តទៅផ្សេងៗទៀតនៅថ្ងៃក្រោយទៀត។”
ឯកឧត្ដមប្រធានសហព័ន្ធដដែលមានប្រសាសន៍ថា ការស្វែងរកមេដាយអន្ដរជាតិ ទី១ ការស្វែងរកមេដាយស៊ីហ្គេម ឆ្នាំ២០២៧ និងការស្វែងរកមេដាយអាស៊ីបន្ដទៀត ក៏ជាយុទ្ធសាស្ត្រដ៏សំខាន់ក្នុងអាណត្តិថ្មី៤ឆ្នាំទៀតនេះ។
សូមជម្រាបជូនថា សហព័ន្ធកីឡាបាល់ទាត់លើតុកម្ពុជាត្រូវបានបង្កើតឡើងនៅដើមឆ្នាំ២០២៣ និងត្រូវបានដាក់បញ្ចូលជាប្រភេទកីឡាអមក្នុងព្រឹត្តិការណ៍កីឡាស៊ីហ្គេម ២០២៣ ដែលកម្ពុជាធ្វើជាម្ចាស់ផ្ទះ។ ក្នុងនោះកម្ពុជាឈ្នះមេដាយមាស១ ប្រាក់៣ និងសំរឹទ្ធ១ សរុប៥គ្រឿង។
សម្រាប់អាណត្តិថ្មី ២០២៦/២០៣០ ឯកឧត្ដម វ៉ាត់ ចំរើន បន្តធ្វើជាប្រធានសហព័ន្ធកីឡាបាល់ទាត់លើតុកម្ពុជា អមដោយអនុប្រធាន២រូប ខណៈលោក ម៉ក់ ចាន់ភិរុណ ជាអគ្គលេខាធិការ និងឯកឧត្ដម ញ៉ាន សុខវិសាល ជាអគ្គហេរញ្ញិក ហើយសរុបសមាជិកប្រតិបត្តិទាំងអស់មានចំនួន១៣រូប៕
