គណៈកម្មាធិការជាតិអូឡាំពិកកម្ពុជា បានចាប់ដៃគូយ៉ាងរឹងមាំជាមួយក្រុមហ៊ុន វឌ្ឍនៈតាមរយៈការចុះអនុស្សារណៈនៃការយោគយល់គ្នា (MoU) ដើម្បីជួយជ្រោមជ្រែង និងបង្កើនសមត្ថភាពអត្តពលិកជាតិឆ្ពោះទៅអូឡាំពិក LA 2028។
ពិធីចុះអនុស្សារណៈយោគយល់នេះបានប្រព្រឹត្តទៅនៅព្រឹកថ្ងៃពុធ ទី២២ ខែកក្កដា ឆ្នាំ២០២៦ នាអគារ Vattanac Capital ដោយមានការចូលរួមចុះហត្ថលេខាដោយផ្ទាល់ពីឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងអ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ។
ឯកឧត្ដម វ៉ាត់ ចំរើន មានប្រសាសន៍ថា នេះជាកិច្ចសហការដ៏សំខាន់ដើម្បីទៅប្រជែងឱ្យបានមេដាយអូឡាំពិកដែលជាសុបិនរបស់ប្រជាជនខ្មែរគ្រប់រូប។ ឯកឧត្ដមលើកឡើងថា ការស្វែងរកមូលនិធិឧបត្ថម្ភបន្ថែមពីការលើការជួយឧបត្ថម្ភពីរដ្ឋាភិបាល គឺជារឿងទូទៅ ទៅហើយ ព្រោះថវិកាពីរដ្ឋមិនគ្រប់គ្រាន់ ស្របពេលការចំណាយលើការហ្វឹកហាត់មានទំហំធំ ជាពិសេសការជួលគ្រូបង្វឹក និងការបោះជំរំហ្វឹកហាត់នៅក្រៅប្រទេស។
ឯកឧត្ដម វ៉ាត់ ចំរើន បានថ្លែងអំណរគុណយ៉ាងជ្រាលជ្រៅដល់ក្រុមហ៊ុន វឌ្ឍនៈ ដែលបានរួមចំណែកយ៉ាងសំខាន់ក្នុងការឧបត្ថម្ភគាំទ្រដល់អត្តពលិកជាតិក្នុងដំណើរទៅព្រឹត្តិការណ៍អូឡាំពិក LA 2028។ ឯកឧត្ដមក៏បានបង្ហើបដែរថា អ្នកឈ្នះមេដាយអូឡាំពិកដំបូងគេនឹងមានឱកាសទទួលបានការឆ្លាក់រូបជាកិត្តិយសនៅតាមទីតាំងកីឡា ជាពិសេសកីឡដ្ឋានធំៗ។
ចំណែកអ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ពិតជារីករាយដែលបានរួមដំណើរជាមួយគណៈកម្មាធិការជាតិអូឡាំពិកកម្ពុជា ហើយនេះគឺជាការចូលរួមជួយចេញពីបេះដូង និងបង្ហាញពីការយកចិត្តទុកដាក់លើអត្តពលិកឱ្យខិតខំប្រឹងប្រែងដើម្បីឈានទៅសម្រេចសុបិនសម្រាប់ប្រជាជនខ្មែរគ្រប់រូប។ ការចូលរួមពីក្រុមហ៊ុនវឌ្ឍនៈ ក៏មានចក្ខុវិស័យវែងឆ្ងាយក្នុងគោលបំណងអភិវឌ្ឍវិស័យកីឡាជាតិឱ្យកាន់តែរីកចម្រើន និងជោគជ័យ។
អ្នកឧកញ៉ា សំអាង វឌ្ឍនៈ បង្ហើបដែរថា ក្រុមហ៊ុន វឌ្ឍនៈ បានត្រៀមការលើកទឹកចិត្តដល់អត្តពលិកឈ្នះមេដាយ ហើយអ្នកឧកញ៉ាក៏បានអំពាវនាវដល់ក្រុមហ៊ុនឯកជនផ្សេងៗទៀតចូលរួមឧបត្ថម្ភគាំទ្រដល់អត្តពលិកជាតិឱ្យបានច្រើនក្នុងដំណើរឆ្ពោះទៅព្រឹត្តិការណ៍អូឡាំពិក LA 2028៕
