ភ្នំពេញ ៖ កាលពីព្រឹកថ្ងៃទី ០៣ ខែមីនា ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា បានអញ្ជើញចូលរួមជាអធិបតី ក្នុងពិធីបើកវគ្គបណ្ដុះបណ្ដាល “ការប្រើប្រាស់ព័ត៌មានវិទ្យា ដើម្បីពង្រឹងសមត្ថភាពស្រង់ទិន្នន័យ និងស្ថិតិកីឡា” ដែលរៀបចំដោយ នាយកដ្ឋានរៀបចំព្រឹត្តិការណ៍ និងស្ថិតិកីឡា ដែលមានរយៈពេល៤ថ្ងៃ គឺ ចាប់ពីថ្ងៃទី៣ ដល់ថ្ងៃទី៦ ខែមីនា ឆ្នាំ២០២៦ដោយមានសិក្ខាកាម ចូលរួមសរុបមានចំនួន ៨០នាក់ (ស្រី៩នាក់) ។
ថ្លែងក្នុងពិធីបើក ឯកឧត្តម វ៉ាត់ ចំរើន បានមានប្រសាសន៍ដូច្នេះថា៖ វគ្គបណ្ដុះបណ្ដាលនាពេលនេះ នឹងជាដើមទុនបន្តពី វគ្គបណ្ដុះបណ្ដាលកម្រិតមុនៗ ដែលសម្រួចនូវបំណិនឌីជីថល ចំណេះដឹងក្នុងកិច្ចការស្ថិតិ និងកីឡា។ ការសិក្សាជំនាញឌីជីថល ពិតជាចាំបាច់ និងពិតជាជួយបង្កើនប្រសិទ្ធភាពការងារ ជាពិសេសចូលរួម ចំណែកអនុវត្តគោល នយោបាយរដ្ឋាភិបាលឌីជីថល គោលនយោបាយសេដ្ឋកិច្ច និងសង្គមឌីជីថលបានដាក់ចេញ ដោយប្រមុខរាជរដ្ឋាភិបាល ។
ទន្ទឹមនឹងនេះ នាយកដ្ឋាន នឹង រៀបចំយុទ្ធសាស្រ្ត ក្នុងការពង្រឹងសមត្ថភាព បច្ចេកវិទ្យាថ្មីៗ បន្ថែមទៀត ដល់ធនធានមនុស្សដែលជាមន្រ្តីជំនាញអនុវត្តការងារដោយផ្ទាល់ សំដៅជំរុញប្រសិទ្ធភាពការងារ និងត្រៀមលក្ខណៈឲ្យបានមួយកម្រិតទៀត សម្រាប់ការចូលរួមសហការការងារ ក្នុងការរៀបចំព្រឹត្តិការណ៍ប្រកួត កីឡាសាកលវិទ្យាល័យអាស៊ាន ឆ្នាំ២០២៨ និងយុវជនអាស៊ី ឆ្នាំ២០៣១ នាពេលខាងមុខ ។
ឯកឧត្តមបន្តថា៖ ជារួម ការធ្វើសមាហរណកម្ម នៃបច្ចេកវិទ្យាព័ត៌មាន នៅទូទាំង ឧស្សាហកម្មផ្សេងៗ គឺជាសក្ខីភាពមួយ ចំពោះសារៈសំខាន់របស់វាក្នុងការបង្កើនប្រសិទ្ធភាព ផលិតភាព និងការផ្តល់ សេវាកម្ម ។ នៅពេលដែលបច្ចេកវិទ្យា បន្តរីកចម្រើន វាត្រូវបានគេរំពឹងថាភាគរយ នៃបុគ្គល ដែលប្រើប្រាស់ប្រព័ន្ធ ព័ត៌មានវិទ្យា នឹងកើនឡើង ដែលធ្វើឱ្យការផ្លាស់ប្តូរទិដ្ឋភាពនៃឧស្សាហកម្មពិភពលោកបន្ថែមទៀត។
ការយល់ដឹង អំពីនិន្នាការទាំងនេះគឺ ចាំបាច់សម្រាប់អ្នកពាក់ព័ន្ធ ដែលមានគោលបំណងប្រើប្រាស់ បច្ចេកវិទ្យាសម្រាប់ការរីកចម្រើន និងការច្នៃប្រឌិត ។ ជាពិសេស សម្រាប់ការប្រមូល និងវិភាគទិន្នន័យ និងស្ថិតិកីឡា។ ដោយសារឧស្សាហកម្មកីឡា ពឹងផ្អែកកាន់តែខ្លាំងឡើងលើការសម្រេចចិត្តដែលជំរុញដោយទិន្នន័យ ការយល់ដឹងពីរបៀបប្រមូលផ្តុំ គ្រប់គ្រង និងបកស្រាយទិន្នន័យកីឡាប្រកបដោយប្រសិទ្ធភាព បានក្លាយជាកត្តាចាំបាច់សម្រាប់អត្តពលិក គ្រូបង្វឹក អ្នកវិភាគ និងអង្គការកីឡា៕
