ព័ត៌មានលម្អិត

វៀតណាម និងបារាំង ប្ដេជ្ញាបន្តជំរុញការផ្សព្វផ្សាយ «គុនខ្មែរ» លើឆាកអន្តរជាតិ

Published on 11-09-2026 1775 មើល

ប្រតិភូសហព័ន្ធកីឡាប្រដាល់គុនខ្មែរអន្តរជាតិប្រចាំប្រទេសវៀតណាម ដឹកនាំដោយលោក Ho Than Liem ជាប្រធាន បានចូលជួបសម្ដែងការគួរសមជាមួយ ឯកឧត្ដមបណ្ឌិត ថោង ខុន ទេសរដ្ឋមន្ត្រី និងជាប្រធានគណៈកម្មាធិការជាតិអូឡាំពិកកម្ពុជា (NOCC) នៅព្រឹកថ្ងៃសុក្រ ទី១០ ខែកញ្ញា ឆ្នាំ២០២៦ នេះ។

តាមការបញ្ជាក់របស់ ឯកឧត្ដម មៀម រ៉ា ស្ថាបនិក និងជាប្រធានកិតិ្តយសមួយជីវិតនៃសហព័ន្ធកីឡាប្រដាល់គុនខ្មែរអន្តរជាតិ បានឱ្យដឹងថា ក្នុងជំនួបនោះ លោក Ho Than Liem បានសម្តែងនូវការដឹងគុណយ៉ាងជ្រាលជ្រៅជូនចំពោះរាជរដ្ឋាភិបាលកម្ពុជា និង NOCC ដែលបានបញ្ជូនអត្តពលិកគុនខ្មែរទៅចូលរួមប្រកួតក្នុងព្រឹត្តិការណ៍ «កីឡាប្រដាល់គុនខ្មែរជើងឯកអាស៊ី» នៅខេត្ត Can Tho ប្រទេសវៀតណាម នាពេលថ្មីៗនេះ រហូតទទួលបានជោគជ័យយ៉ាងត្រចះត្រចង់។
Uploaded image នៅក្នុងឱកាសនោះដែរ ភាគីវៀតណាមបានស្នើសុំផ្លូវការនូវការជួយជ្រោមជ្រែងពីកម្ពុជា ដោយសុំឱ្យបញ្ជូនគ្រូបង្វឹកគុនខ្មែរជើងចាស់ និងមានសមត្ថភាពឆ្នើមៗ ទៅជួយបណ្ដុះបណ្ដាលកីឡាករ-កីឡាការិនីវៀតណាម ដើម្បីត្រៀមខ្លួនធ្វើជាម្ចាស់ផ្ទះរៀបចំព្រឹត្តិការណ៍ «គុនខ្មែរជើងឯកពិភពលោក» នៅខេត្ត Can Tho នាពេលខាងមុខ។ ភាគីវៀតណាមបានអះអាងពីជំហរយ៉ាងរឹងមាំក្នុងការគាំទ្រ និងរួមចំណែកផ្សព្វផ្សាយកីឡាប្រដាល់គុនខ្មែរជារៀងរហូត។
Uploaded image ជាការឆ្លើយតប ឯកឧត្ដមបណ្ឌិត ថោង ខុន បានថ្លែងអំណរគុណយ៉ាងជ្រាលជ្រៅចំពោះសហព័ន្ធកីឡាប្រដាល់គុនខ្មែរអន្តរជាតិប្រចាំប្រទេសវៀតណាម ដែលបានខិតខំរៀបចំព្រឹត្តិការណ៍ជើងឯកអាស៊ីបានយ៉ាងល្អប្រសើរ ជាពិសេសនៅលើទឹកដីខេត្ត Can Tho ដែលជាតំបន់មានប្រជាជនដើមកំណើតខ្មែររស់នៅច្រើន និងមានការគាំទ្រយ៉ាងផុសផុល។
Uploaded image ក្រៅពីប្រតិភូកីឡាមកពីវៀតណាម នៅថ្ងៃដដែលនោះ ឯកឧត្ដមបណ្ឌិត ថោង ខុន ក៏បានទទួលជួបប្រតិភូគុនខ្មែរប្រចាំប្រទេសបារាំង ដឹកនាំដោយលោកស្រី Mme Cendy និងលោក Eric ផងដែរ។ តំណាងប្រតិភូបារាំងបានលើកឡើងដោយមោទនភាពថា បច្ចុប្បន្នពាក្យថា «គុនខ្មែរ» (Kun Khmer) កំពុងតែទទួលបានការចាប់អារម្មណ៍ និងផ្សព្វផ្សាយយ៉ាងទូលំទូលាយនៅតាមបណ្តាប្រទេសនានាទូទាំងទ្វីបអឺរ៉ុប៕

Uploaded image

អត្ថបទពាក់ព័ន្ធ

ព្រឹត្តិការណ៍ «កីឡាកុមារអូឡាំពិក លើកទី២» ត្រលប់មកវិញយ៉ាងអធិកអធម ដោយបន្ថែមអាយុ និ...

1 សប្តាហ៍មុន

ទិវារត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្តឆ្នាំនេះមានអ្នកចុះឈ្មោះ១២០០...

1 សប្តាហ៍មុន

កីឡាជាតិ ឆ្នាំ២០២៦ ជាការត្រៀមឆ្ពោះទៅធ្វើម្ចាស់ផ្ទះព្រឹត្តិការណ៍អន្តរជាតិធំៗចំនួន...

2 សប្តាហ៍មុន

សិក្ខាកាមជាអត្តពលិកជម្រើសជាតិ១៤២រូបទទួលបានការបណ្ដុះបណ្ដាលស្ដីពីការប្រឆាំងដូប៉ាក្...

3 សប្តាហ៍មុន