ក្រចេះ៖ គណៈកម្មាធិការជាតិអូឡាំពិកកម្ពុជា (NOCC) បានរៀបចំវគ្គសិក្សាសាមគ្គីអូឡាំពិក ស្ដីពី «រដ្ឋបាលកីឡា» ប្រចាំឆ្នាំ២០២៦ ជូនដល់សិក្ខាកាមចំនួន ២៤រូប ដែលជាមន្ត្រី និងគ្រូកីឡា កំពុងបម្រើការងារនៅខេត្តក្រចេះ ក្នុងគោលបំណងលើកកម្ពស់ចំណេះដឹងផ្នែករដ្ឋបាលកីឡា ព្រមទាំងពង្រឹងសមត្ថភាពដឹកនាំ និងគ្រប់គ្រង ដើម្បីរួមចំណែកអភិវឌ្ឍវិស័យកីឡានៅមូលដ្ឋានឱ្យកាន់តែមានប្រសិទ្ធភាព។
វគ្គសិក្សានេះ មានរយៈពេល ៤ថ្ងៃ ចាប់ពីថ្ងៃទី៧ ដល់ថ្ងៃទី១០ ខែកញ្ញា ឆ្នាំ២០២៦ ដោយបានផ្ដល់នូវចំណេះដឹង និងបទពិសោធន៍សំខាន់ៗពាក់ព័ន្ធនឹងការគ្រប់គ្រង និងអភិវឌ្ឍវិស័យកីឡា។ ពិធីបិទវគ្គសិក្សា បានប្រព្រឹត្តទៅក្រោមវត្តមាន ឯកឧត្តម ណយ ផាណា ទីប្រឹក្សាប្រចាំការ តំណាងឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា។
មានប្រសាសន៍ក្នុងពិធីបិទ ឯកឧត្តម ណយ ផាណា បានគូសបញ្ជាក់ថា តាមរយៈការសិក្សារយៈពេល ៤ថ្ងៃ វគ្គសិក្សានេះបានផ្ដល់នូវមេរៀនសំខាន់ៗជាច្រើន ដោយក្រៅពីការសិក្សាអំពីប្រវត្តិ និងរចនាសម្ព័ន្ធដឹកនាំរបស់ចលនាអូឡាំពិកអន្តរជាតិ សិក្ខាកាមក៏ទទួលបានចំណេះដឹងពាក់ព័ន្ធនឹង អភិបាលកិច្ចល្អ វេជ្ជសាស្ត្រកីឡា និងការរៀបចំព្រឹត្តិការណ៍កីឡា ផងដែរ។
ឯកឧត្តមបានបន្ថែមថា ចំណេះដឹងដែលទទួលបានពីវគ្គសិក្សានេះ នឹងជួយពង្រឹងសមត្ថភាពដឹកនាំ និងគ្រប់គ្រងរបស់មន្ត្រី និងគ្រូកីឡា ដើម្បីយកទៅអនុវត្តជាក់ស្ដែងក្នុងការងារ និងចូលរួមជំរុញសកម្មភាពកីឡានៅខេត្តក្រចេះ ឱ្យកាន់តែមានការរីកចម្រើន និងប្រសិទ្ធភាព។
វគ្គសិក្សាសាមគ្គីអូឡាំពិក ស្ដីពី «រដ្ឋបាលកីឡា» គឺជាផ្នែកមួយនៃការគាំទ្ររបស់ចលនាអូឡាំពិក ក្នុងការអភិវឌ្ឍធនធានមនុស្សក្នុងវិស័យកីឡា តាមរយៈការផ្ដល់ចំណេះដឹង បង្កើនសមត្ថភាព និងលើកកម្ពស់គុណភាពការងាររដ្ឋបាលកីឡានៅថ្នាក់មូលដ្ឋាន។
