គ្រូឧទ្ទេសប្រចាំវគ្គសាមគ្គីអូឡាំពិកស្តីពីរដ្ឋបាលកីឡា បានគូសបញ្ជាក់ថា វគ្គនេះបានផ្តល់អត្ថប្រយោជន៍ចង្អុលបង្ហាញផ្លូវជួយឱ្យការដឹកនាំក្នុងវិស័យកីឡាកាន់តែល្អប្រសើរ។
ឯកឧត្តម ណយ ផាណា គ្រូឧទ្ទេស និងជាមន្រ្តី គណៈកម្មាធិការជាតិអូឡាំពិកកម្ពុជា តំណាង ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានរំលេចលើកឡើងថា វគ្គសាមគ្គីអូឡាំពិកស្តីពីរដ្ឋបាលកីឡា ដែលគណៈកម្មាធិការជាតិអូឡាំពិកកម្ពុជា បញ្ជ្រាបជូនដល់មន្រ្តីនៃ មន្ទីរអប់រំ យុវជន និងកីឡាខេត្តកណ្តាលរយៈពេល៤ថ្ងៃចាប់ពីថ្ងៃទី២៣ដល់២៦ ខែ កុម្ភៈ ឆ្នាំ២០២៦នេះ បានផ្តល់នូវអត្ថប្រយោជន៍ខ្លាំងណាស់សម្រាប់ប្រើប្រាស់និងដឹកនាំក្នុងវិស័យកីឡាដែលជួយចង្អុលបង្ហាញអំពីរបៀបនៃការដឹកនាំធ្វើឱ្យវិស័យកីឡាក្នុងខេត្តកាន់តែរីកចម្រើនល្អប្រសើរ។
លោកថា វគ្គនេះបានបងៀននូវមេរៀនសំខាន់ៗជាច្រើនមានដូចជាប្រវត្តរបស់ គណៈកម្មាធិការអូឡាំពិកអន្តរជាតិ និងរចនាដឹកនាំរបស់អង្គការសង្គមកីឡារបស់អន្តរជាតិ ដែលជួយឱ្យថ្នាក់ដឹកនាំកីឡា យកទៅអនុវត្តនិងប្រើប្រាស់ក្នុងការដឹកនាំកីឡា។អភិបាលកិច្ចល្អ បញ្ជាក់អំពីគុណធម៌នៃការដឹកនាំនៅក្នុងសង្គមកីឡា ។ការរៀបចំផែនការសម្រាប់ថ្នាក់ដឹកនាំ គឺជាការត្រៀមរៀបចំផែនការនានា មានដូចជា ការជ្រើសរើសកីឡាករកីឡាការិនីស្របតាមវេជ្ជៈសាស្រ្តកីឡាដើម្បីទទួលបានធនធានកីឡាល្អនៅពេលខាងមុខ និងការរៀបចំផែនការសម្រាប់ត្រៀមដឹកនាំប្រតិភូកីឡាចេញទៅប្រកួតទាំងក្នុងនិងក្រៅប្រទេសឈានទៅសម្រេចបានការដឹកនាំដោយជោគជ័យ។
មានន័យថា ការលេងប្រកបដោយភាពត្រឹមត្រូវ និងយុត្តិធម៌ ពិសេស គឺរូបមន្តនៃការប្រកួតដែលជួយឱ្យការរៀបចំការប្រកួតប្រព្រឹត្តិទៅបានល្អ និងរលូនប្រកបដោយភាពជោគជ័យ។
ការរៀបចំកម្មវិធីហ្វឹកហាត់ដែលជួយឱ្យគ្រូនិងកីឡាករកីឡាការិនីមានផែនការហ្វឹកហាត់ឈានទៅរកគុណភាព និងរីកចម្រើនផ្នែកគុណផលបច្ចេកទេសកីឡា និង ផែនការទាក់ទាញបង្កើនឱ្យមានចំនួនចូលរួមរបស់កីឡាករកីឡាការិនីថ្មីមានកាន់តែច្រើន។
ឯកឧត្តម សង្ឈឹមយ៉ាងមុតមាំថា តាមរយៈវគ្គនេះ សិក្ខាកាមទាំងអស់និងយកចំណេះជំនាញដែលទទួលបានពីគ្រូឧទ្ទេសយកទៅអនុវត្តបញ្ជ្រាបដល់មូលដ្ឋានបន្តដើម្បីការរីកចម្រៀនក្នុងវិស័យកីឡាក្នុងខេត្ត។
សូមបញ្ជាក់ថា វគ្គសាមគ្គីអូឡាំពិកស្តីពីរដ្ឋបាលកីឡា ដែលរៀបចំដោយ គណៈកម្មាធិការជាតិអូឡាំពិកកម្ពុជា ឧបត្ថម្ភដោយ គណៈកម្មាធិការអូឡាំពិកអន្តរជាតិ បានដំណើរការចាប់ពីថ្ងៃទី២៣ដល់២៦ ខែ កុម្ភៈ ឆ្នាំ២០២៦ មានសិក្ខាកាមចូលរួមចំនួន២៤នាក់ មកពីមន្ទីរអប់រំយុវជននិងកីឡា និងគ្រូអប់រំកាយនិងកីឡាមកពីគ្រឹះស្ថានសិក្សាជុំវិញខេត្ត៕
