ព្រះអង្គម្ចាស់ Sheik Joaan Bin Hamad Al Thani បានជាប់ជាព្រះប្រធានថ្មី នៃ ក្រុមប្រឹក្សាអូឡាំពិកអាស៊ី (OCA) ជំនួសលោក Randhir Singh។
បើតាមប្រសាសន៍ ឯកឧត្ដម វ៉ាត់ ចំរើន អគ្គលេខាធិការ នៃ គណៈកម្មាធិការជាតិអូឡាំពិកកម្ពុជា ការជ្រើសរើសប្រធានថ្មីនេះ បានធ្វើឡើងក្នុង មហាសន្និបាត ក្រុមប្រឹក្សាអូឡាំពិកអាស៊ី លើកទី ៦៦ ដែលប្រព្រឹត្តទៅនៅ រដ្ឋធានី តាស្កិន ប្រទេសអ៊ូបេគីស្ថាន។
ឯកឧត្ដម វ៉ាត់ ចំរើន បានបញ្ជាក់ដែរថា ក្រៅពីការពិភាក្សាពី ផែនការ ការងារផ្សេងៗ មហាសន្និបាតនេះក៏ផ្ដោតទៅលើការបញ្ចប់អាណត្តិចាស់ និងជ្រើសរើស ប្រធានថ្មី ជំនួសលោក Randhir Singh ដែលមានវ័យច្រើន និងមានបញ្ហាសុខភាពផងដែរ។
ដោយសារតែមិនមានបេក្ខភាពផ្សេងទៀត ព្រះអង្គម្ចាស់ Sheik Joaan Bin Hamad Al Thani បានទទួលសម្លេងគាំទ្រជាឯកច្ឆ័ន្ទពីប្រទេសទាំង ៤៥ ដែលជាសមាជិក OCA។
ក្នុងនាមជា ព្រះប្រធានថ្មី ព្រះអង្គម្ចាស់ បានបង្ហាញការប្ដេជ្ញាព្រះទ័យថា នឹងបង្រួបបម្រួម ព្រមទាំងធ្វើឱ្យចលនាអូឡាំពិកអាស៊ី កាន់តែសកម្ម ក៏ដូចជាជំរុញឱ្យមានតម្លាភាព គណនេយ្យភាព និងអភិបាលកិច្ចល្អក្នុងការគ្រប់គ្រង។
សូមរំឭកថា លោក Randhir Singh ជនជាតិឥណ្ឌា វ័យ៧៩ឆ្នាំ បានចូលកាន់តំណែងជាប្រធានក្រុមប្រឹក្សាអូឡាំពិកអាស៊ី កាលខែកញ្ញា ឆ្នាំ២០២១៕
