ដោយទទួលបានការអនុញ្ញាតជាគោលការណ៍ដ៏ខ្ពង់ខ្ពស់បំផុតពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា តំណាងឯកឧត្ដមបណ្ឌិតទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា រួមជាមួយនឹងឯកឧត្ដម សេង វណ្ណៈ អភិបាលរងតំណាងដ៏ខ្ពង់ខ្ពស់ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញចូលរួមពិធីចុះហត្ថលេខាលើកិច្ចសន្យាក្រុងម្ចាស់ផ្ទះព្រឹត្តិការណ៍កីឡាយុវជនអាស៊ីលើកទី៥ ឆ្នាំ២០៣១។
ពិធីចុះហត្ថលេខានេះបានប្រព្រឹត្តទៅនៅថ្ងៃចន្ទ ទី ២៦ ខែមករា ឆ្នាំ២០២៦ នៅរដ្ឋធានីតាស្កិន ប្រទេសអ៊ូបេគីស្ថាន ដោយមានការចូលរួមជាហត្ថលេខីដោយឯកឧត្ដម Timothy Fox ប្រធានស្តីទីក្រុមប្រឹក្សាអូឡាំពិកអាស៊ី (OCA)។
បើតាមប្រសាសន៍ឯកឧត្ដម វ៉ាត់ ចំរើន កិច្ចសន្យានេះជាយន្តការស្តង់ដាប្រតិបត្តិរៀបចំព្រឹត្តិការណ៍ប្រកួតពហុកីឡាយុវជនអាស៊ី ២០៣១ ដែលបែងចែកការទទួលខុសត្រូវរវាងម្ចាស់កម្មសិទ្ធិ និងម្ចាស់ផ្ទះឱ្យបានត្រឹមត្រូវតាមនិយាមកីឡាអន្តរជាតិ។ ទន្ទឹមនឹងនេះ កិច្ចសន្យានេះក៏បញ្ជាក់ និងធានាឱ្យព្រឹត្តិការណ៍ប្រកួតរៀបចំ និងប្រព្រឹត្តទៅដោយរលូន ទន់ភ្លន់ ម៉ឺងម៉ាត់ និងជោគជ័យសម្រាប់សមាជិកអូឡាំពិកទាំង៤៥ប្រទេសត្រៀមចូលរួម។
ឯកឧត្ដម វ៉ាត់ ចំរើន អះអាងថា ចលនាអូឡាំពិកកម្ពុជាប្តេជ្ញាខិតខំប្រឹងប្រែងត្រៀមគ្រប់លក្ខណៈសម្បត្តិ ដើម្បីបំពេញកាតព្វកិច្ចជូនកំណត់ត្រាប្រវត្តិសាស្រ្តថ្មីសម្រាប់កម្ពុជា និងចូលរួមអបអរសាទរកម្ពុជាក្លាយជាប្រទេសមានសេដ្ឋកិច្ចមធ្យមកម្រិតខ្ពស់ឆ្នាំ២០៣០។
ឯកឧត្ដមអគ្គលេខាធិការ NOCC បានអំពាវនាវសូមឱ្យមានការជឿជាក់លើរាជរដ្ឋាភិបាល និងប្រជាជនកម្ពុជាដែលនឹងធ្វើឱ្យប្រទេសជាតិមានភាពអស្ចារ្យម្ដងទៀតក្នុងឆ្នាំ២០៣១៕
