ការប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ និងពានរង្វាន់ឯកឧត្ដមបណ្ឌិត ថោង ខុន ឆ្នាំ ២០២៥ បាននិងកំពុងដំណើរការនៅសាលកីឡាកាយសម្ព័ន្ធនៅពហុកីឡដ្ឋានជាតិអូឡាំពិក ដែលប្រព្រឹត្តទៅពីថ្ងៃទី២៦ដល់ថ្ងៃទី៣១ ខែធ្នូ។
ឯកឧត្តម ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា មានប្រសាសន៍ថា ការចូលរួមឆ្នាំនេះមិនខុសពីឆ្នាំកន្លងទៅឡើយ ដោយមានក្រុមក្រសួងមហាផ្ទៃ ក្រសួងការពារជាតិ ខេត្តកំពង់ឆ្នាំង ខេត្តក្រចេះ និង ខេត្តស្ទឹងត្រែង មានកីឡាករ កីឡាការិនី៦៤នាក់ និង មន្ត្រីបច្ចេកទេស៣៣នាក់ ក្រោមការឧបត្ថម្ភថវិកាពីក្រសួងអប់រំ យុវជន និងកីឡា។
ឯកឧត្ដមអគ្គលេខាធិការសង្កត់ធ្ងន់ថា អ្វីដែលត្រូវផ្ដោតសំខាន់ខ្លាំងនោះ គឺ ការផ្ដល់ពិន្ទុពីមន្ត្រីបច្ចេកទេសត្រូវតែមានតម្លាភាព យុត្តិធម៍ និង fair play។ ទន្ទឹមនឹងនេះដែរ សហព័ន្ធក៏បានផ្ដោតលើការសម្រួចកីឡាករ កីឡាការិនីឆ្ពោះទៅកាន់ការប្រកួតព្រឹត្តិការណ៍អន្តរជាតិនានាក្នុងឆ្នាំ ២០២៦ និងឆ្នាំបន្តបន្ទាប់ទៀត ជាពិសេសឆ្នាំ ២០៣១ ដែលកម្ពុជាធ្វើជាម្ចាស់ផ្ទះព្រឹត្តិការណ៍កីឡាយុវជនអាស៊ី។ ជាក់ស្ដែង វត្តមានកីឡាករ កីឡាការិនីវ័យ១១ទៅ១២ឆ្នាំមានច្រើនក្នុងការប្រកួតជើងឯកថ្នាក់ជាតិឆ្នាំនេះ៕
