សហព័ន្ធខ្មែរកីឡាហាប់គីដូ បានធ្វើពិធីប្រគល់លិខិតបញ្ជាក់ វិញ្ញាបនបត្រ និងសញ្ញាបត្រ សម្រាប់ម្ចាស់ខ្សែក្រវាត់ចំនួន ៣ ពណ៌ដល់ កីឡាករ កីឡាការិនី របស់ខ្លួននៅរសៀលថ្ងៃ អាទិត្យ ទី ២៨ ខែ ធ្នូ ឆ្នាំ ២០២៥ នេះ។
លោក គង់ ចាន់ធីណា អគ្គលេខាធិការ នៃ សហព័ន្ធខ្មែរកីឡាហាប់គីដូ មានប្រសាសន៍ថា សម្រាប់កម្រិតខ្សែក្រវាត់បៃតង ទទួលបានលិខិតបញ្ជាក់ , ខ្សែក្រវាត់ត្នោត ទទួលបាន វិញ្ញាបនបត្រ និង ខ្សែក្រវាត់ខ្មៅទទួលបានសញ្ញាបត្រ។
ទាក់ទងនឹងលក្ខខណ្ឌ នៃ ការបញ្ជាក់ពីកម្រិតសមត្ថភាព លោកអគ្គលេខាធិការ បានឱ្យដឹងថា សម្រាប់ការទទួលបានលិខិតបញ្ជាក់ កីឡាករ កីឡាការិនី ត្រូវឆ្លងកាត់ការហ្វឹកហាត់រយៈពេល៦ខែ។ ចំណែកការទទួលបានវិញ្ញាបនបត្រ ត្រូវហ្វឹកហាត់រយៈពេលមួយឆ្នាំ និងការទទួលបានសញ្ញាបត្រ ត្រូវហ្វឹកហាត់មួយឆ្នាំកន្លះ។ បន្ទាប់ពីការហ្វឹកហាត់នេះដែរ កីឡាករ កីឡាការិនី ក៏ត្រូវមានសមត្ថភាព ដល់កម្រិតដែលទទួលស្គាល់ពីគ្រូបង្ហាត់ផងដែរ។
សូមបញ្ជាក់ដែរថា កីឡាករ កីឡាការិនី ដែលទទួលបាន លិខិតបញ្ជាក់ ខ្សែក្រវាត់បៃតង មានកីឡាករ ៣នាក់ កីឡាការិនី ៣នាក់ សរុប ៦ នាក់។ វិញ្ញាបនបត្រ ខ្សែក្រវាត់ត្នោត មានកីឡាករ ៨ នាក់ កីឡាការិនី ២នាក់ សរុប១០នាក់ និងសញ្ញាបត្រខ្សែក្រវាត់ខ្មៅ មានកីឡាករ ៤ នាក់ និងកីឡាការិនី ៥ នាក់ សរុប ៩នាក់៕
