ឯកឧត្ដម ប៊ុយ សុភ័ណ្ឌ ទីប្រឹក្សា គណៈកម្មាធិការជាតិអូឡាំពិកកម្ពុជា និងជាតំណាង ឯកឧត្តម វ៉ាត់ ចំរើន អគ្គលេខាធិការ នៃ គណៈកម្មាធិការជាតិអូឡាំពិកកម្ពុជា បានដឹកនាំក្រុមការងារធ្វើដំណើរទៅដល់ស្រុកស្រីស្នំ ខេត្តសៀមរាប វេលាម៉ោង ៨ ព្រឹកថ្ងៃសៅរ៍ ទី ២៧ ខែធ្នូ ឆ្នាំ ២០២៥ នេះ ដើម្បីជញ្ជូនស្បៀងអាហារ សម្ភារបរិក្ខាពេទ្យ និងសម្ភារៈប្រើប្រាស់ក្រោមជំនួយ មនុស្សធម៌ចលនាអូឡាំពិក ជូនដល់ រដ្ឋបាល ខេត្តឧត្តរមានជ័យ ដើម្បីជួយបន្តដល់អ្នកភៀសសឹក។
បើតាមការបញ្ជាក់ពី ឯកឧត្ដម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា អំណោយប្រជាជនភៀសសឹករបស់ អូឡាំពិក (Olympic Refugees Foundations) ជាគម្រោងពិសេសមួយរបស់ គណៈកម្មាធិការអូឡាំពិកអន្តរជាតិ (IOC) ដោយស្ថាប័នអន្តរជាតិទាំងពីរនេះ បានពិនិត្យលើហេតុផលច្បាស់លាស់ណាស់ ដោយមិនមែនចេះតែផ្តល់ជូននោះទេ មុននឹងសម្រេចចិត្តផ្តល់ជូនអំណោយសប្បុរសធម៌មកដល់កម្ពុជា។
ការផ្តល់ជូននូវអំណោយជនភៀសសឹករបស់ IOC និង OCA នេះត្រូវបានធ្វើឡើងក្នុងស្មារតីស្របតាមគោលការណ៍ ដោយបានចុះ MOU ជាមួយអង្គការសហប្រជាជាតិ ទទួលបន្ទុកជនភៀសសឹក (UNHCR) សម្រាប់ប្រទេសណាដែលមានសង្គ្រាម ឬគ្រោះមហន្តរាយធំៗផ្សេងៗទៀត ក្នុងគោលបំណងរួមចំណែកជាមួយ អង្គការសហប្រជាជាតិ ដើម្បីសម្រាលបន្ទុកទុក្ខលំបាក និងបន្តលើកទឹកចិត្តឱ្យជនភៀសសឹក យុវជន និងកុមារមានសិទ្ធិរស់មានមានជីវិត មានឱកាសសិក្សារៀនសូត្រ ព្រមទាំងមានឱកាសលេងកីឡាផងដែរ៕
