ដោយបានការអនុញ្ញាតពី ឯកឧត្ដមបណ្ឌិតទេសរដ្ឋមន្រ្តី ថោង ខុន ប្រធានគណៈកម្មាធិការជាតិអូឡាំពិកកម្ពុជា ឯឧ វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានចុះហត្ថលេខាលើអនុស្សរណ:យោគយល់ (MoU)មួយរវាងគណកម្មាធិការជាតិអូឡាំពិកនៃប្រទេសទាំងពីរ នាថ្ងៃទី៥ ខែវិច្ឆិកា ឆ្នាំ២០២៥ នៅក្រុង Samara ប្រទេសរុស្សី។
MoU នេះផ្ដោតលើផ្ដោតលើសហប្រតិបត្តិការដ៏សំខាន់ចំនួន៣ ៖
ទី១ គឺការផ្លាស់ប្តូរចំណេះដឹងក្នុងការសិក្សាស្រាវជ្រាវ វិទ្យាសាស្រ្តកីឡាលើការហ្វឹកហាត់កីឡាកម្រិតខ្ពស់ និងបង្កើតឱ្យមានការប្រកួតជាមិត្តភាពក្នុងន័យពង្រឹងបច្ចេកទេសកីឡា។
ទី២ គឺការពង្រឹងកិច្ចគាំទ្រលើកាទូតកីឡាក្នុងគ្រប់វេទិកាចលនាអូឡាំពិក។ ចំណែកចំណុចសំខាន់
ទី៣ គឺការពង្រឹងកិច្ចសហការណ៍អភិវឌ្ឍន៍លើកីឡាប្រពៃណីអត្តសញ្ញាណជាតិនៃប្រទេសទាំងពីរ ពិសេសគុនខ្មែរ និងគុនល្បុក្កតោ។
នេះជាកិច្ចសហប្រតិបត្តិការជាបន្តបន្ទាប់រវាងគណៈកម្មាធិការជាតិអូឡាំពិកកម្ពុជា និង រុស្ស៊ី។ ជាក់ស្ដែងកាលខែមិថុនា ឆ្នាំ២០២៥ កន្លងទៅ ថ្នាក់ដឹកនាំគណៈកម្មាធិការជាតិអូឡាំពិកកម្ពុជា និងឯកឧត្តម Annatoly Borovik ឯកអគ្គរដ្ឋទូតរុស្ស៊ីប្រចាំកម្ពុជា បានជួបពិភាក្សាផ្ដោតលើការកិច្ចសហប្រតិបត្តិការលើចលនាអូឡាំពិក និង ប៉ារ៉ាឡាំពិក ក៏ដូចជាទំនាក់ទំនង ការគាំទ្រគ្នាទៅវិញទៅមកនៅលើការងារការទូតកីឡា៕
