លោក សាន អង្គររាជវ័ន្ធ ជាគ្រូបង្វឹកមួយរូបនៃកីឡាបញ្ចស៊ីឡាត់កម្ពុជាបានបង្ហាញមោទនភាពដែលត្រូវបានជ្រើសរើសជាអាជ្ញាកណ្ដាលចៅក្រមមួយរូបក្នុងប្រភេទកីឡាបញ្ចស៊ីឡាត់ក្នុងព្រឹត្តិការណ៍កីឡាយុវជនអាស៊ី ឆ្នាំ២០២៥ នៅក្រុងម៉ាណាម៉ា ប្រទេសបារ៉ែន។
គ្រូបង្វឹកដែលមានជំនាញគុនល្បុក្កតោដែរនោះចាត់ទុកថា នេះជាបទពិសោធដ៏សំខាន់សម្រាប់លោក និងរំពឹងយកអ្វីដែលបានរៀនសូត្រទៅចែករំលែកដល់អ្នករួមជំនាញកីឡាបញ្ចាត់ស៊ីឡាត់នៅកម្ពុជា។
លោក សាន អង្គររាជវ័ន្ធ "ខ្ញុំមានមោទនភាពយ៉ាងខ្លាំងដែលបានចូលរួមជាអាជ្ញាកណ្ដាលចៅក្រមមួយរូបបន្ថែមពីលើឱកាសដែលបានចូលរួមដឹកនាំកីឡាករ កីឡាការិនីរបស់យើងចូលរួមប្រកួត Asian Youth Games នេះ។ ខ្ញុំបានបទពិសោធថ្មីៗយ៉ាងច្រើន អ៊ីចឹងពេលដល់មាតុភូមិ ខ្ញុំនឹងចែករំលែកដល់កីឡាករ កីឡាការិនី និងគ្រូបង្វឹកយើងដែលត្រៀមរៀនធ្វើជាអាជ្ញាកណ្ដាលចៅក្រមនេះឱ្យបានចំណេះដឹងនេះដែរ។ ខ្ញុំក៏នឹងព្យាយាមសិក្សាស្វែងយល់បន្ថែមទៀតពីការងារហ្នឹងដើម្បីឱ្យទាន់ការអភិវឌ្ឍនៃកីឡាបញ្ចាត់ស៊ីឡាត់នេះ។"
លោក សាន អង្គររាជវ័ន្ធ រំឭកថា លោកក៏ធ្លាប់ចូលរួមធ្វើជាអាជ្ញាកណ្ដាលចៅក្រមកីឡាបញ្ចសីឡាត់ជាលក្ខណៈអន្តរជាតិដែរ គឺកាលកម្ពុជាធ្វើម្ចាស់ផ្ទះកីឡាស៊ីហ្គេម ឆ្នាំ២០២៣។
ទាក់ទងទៅនឹងលទ្ធផលដែលក្រុមជម្រើសជាតិកម្ពុជាទទួលបានមេដាយសំរឹទ្ធមួយគ្រឿងពីកីឡាបញ្ចស៊ីឡាត់ក្នុងព្រឹត្តិការណ៍កីឡាយុវជនអាស៊ីនៅបារ៉ែន អ្នកជំនាញដដែលអះអាងថា ជាសមិទ្ធផលដ៏វិសេសវិសាល ព្រោះជាលើកទី១ហើយដែលកូនក្រុមខ្លួនបានចូលរួមការប្រកួតកម្រិតខ្ពស់នេះ។
