ឯកឧត្ដមបណ្ឌិត ទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជាបានទទួលជួប និងពិភាក្សាការងារជាមួយ ឯកឧត្តម Annatoly Borovik ឯកអគ្គរដ្ឋទូតរុស្ស៊ី ប្រចាំកម្ពុជា នៅទីស្នាក់ការ គណៈកម្មាធិការជាតិអូឡាំពិកកម្ពុជា នារសៀលថ្ងៃពុធ ទី១០ ខែកញ្ញា ឆ្នាំ២០២៥។
ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា បានមានប្រសាសន៍ថា ជំនួបសវនាការដ៏សំខាន់នេះ ផ្ដោតលើការសហប្រតិបត្តិការលើ ចលនាអូឡាំពិក និង ប៉ារ៉ាឡាំពិក ក៏ដូចជាទំនាក់ទំនង ការគាំទ្រគ្នាទៅវិញទៅមក នៅលើការងារការទូតកីឡា។
ឯកឧត្តម អគ្គលេខាធិការ បានបន្តទៀតថា រុស្ស៊ីក៏បានត្រៀមការគាំទ្រ ដល់ការផ្ដល់អាហារូបករណ៍ ដល់និស្សិតកីឡាកម្ពុជា និងការបណ្ដុះបណ្ដាលជំនាញវិជ្ជាជីវៈកីឡា ឱ្យបានប្រសើរ និងបណ្ដុះធនធានមនុស្សក្នុងវិស័យកីឡានៅកម្ពុជា។ ទន្ទឹមនឹងនេះ កិច្ចសហប្រតិបត្តិការចលនាអូឡាំពិក រវាងប្រទេសទាំង២ ក៏ត្រូវតែពង្រឹងដោយសារតែ រុស្ស៊ី កំពុងត្រូវការ ការគាំទ្ររបស់ប្រទេសជាសមាជិក ចលនាអូឡាំពិកការទូតកីឡា លើឆាកអន្តរជាតិ ទាំងចលនាអូឡាំពិក និងប៉ារ៉ាឡាំពិក ក៏ដូចជាការគាំទ្រគ្នាទៅវិញទៅមករវាង អូឡាំពិក និងប៉ារ៉ាឡាំពិក នៃប្រទេសទាំង ២ ។
ឯកឧត្ដម វ៉ាត់ ចំរើន បានសង្កត់ធ្ងន់ដែរថា ដោយសារតែ រុស្ស៊ី ជាប្រទេសមានគុណវុឌ្ឍិ ដ៏ខ្ពស់ក្នុងវិស័យកីឡា ដូច្នេះ កម្ពុជា អាចរៀនសូត្របានច្រើនទាំងការហ្វឹកហាត់ផ្ទាល់ និងវិទ្យាសាស្ត្រកីឡា ចិត្តសាស្ត្រកីឡា ក៏ដូចជាការគ្រប់គ្រង។ ជាក់ស្ដែង ថ្នាក់ដឹកនាំកីឡាជាច្រើននៅ កម្ពុជា ធ្លាប់ជាអតីតនិស្សិត ទៅសិក្សានៅប្រទេស រុស្ស៊ី នាពេលកន្លងមកដែរ៕
