ក្រោយបញ្ចប់បេសកកម្មដោយជោគជ័យក្នុងការប្រកួតកីឡាហាប់គីដូជើងឯកអាស៊ី លើកទី៣ ឆ្នាំ២០២៦ នៅប្រទេសចិន ដោយដណ្តើមបានមេដាយសរុបចំនួន ៣៥គ្រឿង រួមមាន មេដាយមាស ១២ ប្រាក់ ៩ និងសំរឹទ្ធ ១៤ លោក គង់ ចាន់ធីណា អគ្គលេខាធិការសហព័ន្ធខ្មែរកីឡាហាប់គីដូ បានថ្លែងអំណរគុណដល់ថ្នាក់ដឹកនាំសហព័ន្ធ ព្រមទាំងភាគីពាក់ព័ន្ធទាំងអស់ ដែលបានចូលរួមគាំទ្រ និងជួយជ្រោមជ្រែងដល់ការអភិវឌ្ឍវិស័យហាប់គីដូនៅកម្ពុជា។
លោក គង់ ចាន់ធីណា បានលើកឡើងថា ភាពជោគជ័យនេះ គឺជាលទ្ធផលនៃការខិតខំប្រឹងប្រែងរួមគ្នារបស់គ្រួសារហាប់គីដូកម្ពុជា ដែលបានចូលរួមចំណែកធ្វើឱ្យវិស័យកីឡាមួយនេះមានការរីកចម្រើនជាបន្តបន្ទាប់ និងអាចចេញទៅចូលរួមប្រកួតលើឆាកអន្តរជាតិបានរហូតដល់ ៣លើក។
ជាពិសេស លោកបានថ្លែងអំណរគុណដល់គ្រូបង្វឹក កីឡាករ កីឡាការិនី និងអាណាព្យាបាល ដែលបានលះបង់ទាំងពេលវេលា កម្លាំងកាយចិត្ត និងធនធានផ្ទាល់ខ្លួន ដើម្បីចូលរួមគាំទ្រដល់ការចេញទៅប្រកួតអន្តរជាតិនាពេលកន្លងមក និងក្នុងការប្រកួតជើងឯកអាស៊ីលើកនេះ។
លោកបានបញ្ជាក់ថា ការចេញទៅប្រកួតជើងឯកអាស៊ីនៅប្រទេសចិនលើកនេះ ត្រូវចំណាយថវិកាជាង ១៥,០០០ដុល្លារអាមេរិក ដែលក្នុងនោះគ្រូបង្វឹក កីឡាករ កីឡាការិនី និងអាណាព្យាបាល បានចូលរួមជួយឧបត្ថម្ភទៅតាមលទ្ធភាព ដោយបង្ហាញពីស្មារតីសាមគ្គី និងការរួមចំណែកដ៏សំខាន់ក្នុងការជួយសហព័ន្ធឱ្យអាចបំពេញបេសកកម្មអន្តរជាតិបានដោយជោគជ័យ។
លោក គង់ ចាន់ធីណា ក៏បានឱ្យដឹងផងដែរថា តាមអនុសាសន៍របស់ឯកឧត្តមអគ្គនាយក ប្រសិនបើកម្មវិធីប្រកួតរបស់សហព័ន្ធស្របតាមលក្ខន្តិក និងបទប្បញ្ញត្តិរបស់ក្រសួងអប់រំ យុវជន និងកីឡា នោះសហព័ន្ធនឹងអាចទទួលបានការឧបត្ថម្ភពីក្រសួង ដូចទៅនឹងសហព័ន្ធកីឡាដទៃទៀតផងដែរ។
ជាមួយគ្នានេះ លោក គួច ហុងជៀក ប្រធានស្តីទីសហព័ន្ធខ្មែរកីឡាហាប់គីដូ ដែលបានដឹកនាំប្រតិភូ និងម្ចាស់ឧបត្ថម្ភទៅទទួលស្វាគមន៍ក្រុមកីឡាហាប់គីដូកម្ពុជានៅអាកាសយានដ្ឋានអន្តរជាតិតេជោ កាលពីព្រលប់ថ្ងៃចន្ទ បានសម្តែងក្តីរីករាយ និងមោទនភាពចំពោះសមិទ្ធផលដែលក្រុមកីឡាករ កីឡាការិនីកម្ពុជាសម្រេចបាន។
លោក គួច ហុងជៀក បានចាត់ទុកលទ្ធផលដ៏ល្អប្រសើរនេះថា ជាសក្ខីភាពបង្ហាញពីការខិតខំប្រឹងប្រែងរបស់សហព័ន្ធ និងកីឡាករ កីឡាការិនី ហើយជាសញ្ញាវិជ្ជមានមួយដែលបង្ហាញថា ហាប់គីដូកម្ពុជាកំពុងចាប់ផ្តើមបង្ហាញសក្តានុពល និងមានពន្លឺកាន់តែច្បាស់លាស់លើឆាកកីឡាអន្តរជាតិ។
ជ័យជម្នះដោយដណ្តើមបានមេដាយសរុប ៣៥គ្រឿងនៅជើងឯកអាស៊ី លើកទី៣ ឆ្នាំ២០២៦ នេះ មិនត្រឹមតែជាសមិទ្ធផលដ៏មានមោទនភាពសម្រាប់ក្រុមកីឡាហាប់គីដូកម្ពុជាប៉ុណ្ណោះទេ ប៉ុន្តែថែមទាំងជាកម្លាំងចិត្តដ៏សំខាន់សម្រាប់សហព័ន្ធ ក្នុងការបន្តពង្រឹងការអភិវឌ្ឍធនធានកីឡាករ និងត្រៀមខ្លួនសម្រាប់ការប្រកួតលើឆាកអន្តរជាតិនាពេលអនាគត។
