មានរយៈពេល៧ឆ្នាំហើយដែលលោក Martin បានមករស់នៅប្រទេសកម្ពុជា ដោយមានមុខជំនួញនៅខេត្តកំពត ផ្ដោតលើមុខរបរផលិតប្រេងដូង តែ និង អាល់កុល ជាដើម។
ក្នុងការរស់នៅប្រទេសកម្ពុជា បុរសជនជាតិប៉ូឡូញក៏បានឆ្លៀតហ្វឹកហាត់កីឡាប្រដាល់សកល និងធ្លាប់បានប្រកួតមួយលើកដែរ។ នៅល្ងាចថ្ងៃសុក្រ ទី២៤ ខែកក្កដា ឆ្នាំ ២០២៦ លោក Martin នឹងបង្ហាញខ្លួនលើកដំបូងក្នុងកម្មវិធីប្រដាល់សកលប្រចាំខែ Dragon the Golden Ring តទល់កីឡាករជម្រើសជាតិកម្ពុជា Rajapov Abdullah។
បុរសវ័យ៤២ឆ្នាំដដែលក៏បានសរសើរពីសមត្ថភាពរបស់ Rajapov ដែលជាកីឡាករវ័យក្មេងប្រកបដោយសក្ដានុពល។ លោកថា គេនឹងទទួលបានបទពិសោធថែមទៀតពីការប្រកួតជាមួយលោក ហើយសង្ឃឹមថា លោកនឹងអាចទទួលបានលទ្ធផល។
លោក Martin បង្ហើបដែរថា ក្រៅពីប្រដាល់សកល លោកបានហ្វឹកហាត់កីឡាប្រដាល់គុនខ្មែរដែរ តែមិនសូវមានពេលច្រើនឡើយ ដោយសាររវល់នឹងមុខជំនួញផ្ទាល់ខ្លួន។ ទន្ទឹមនឹងនេះ លោកក៏ធ្លាប់លេងកីឡាប្រដាល់ kickboxing លេងកីឡាបាល់ទាត់កម្រិតអាជីព និងកីឡាជាច្រើនទៀត។
លោក Martin អះអាងថា បានស្គាល់ប្រទេសកម្ពុជាដំបូងឡើយក្នុងឆ្នាំ២០១៨។ ចាប់តាំងពីពេលនោះមកលោក ពិតជាស្រលាញ់កម្ពុជាយ៉ាងខ្លាំងទាំងប្រជាជន និង អាកាសធាតុ ហើយបានចាត់ទុកដូចជាផ្ទះរបស់លោកដែរ។ លោកថា រាល់ពេលលោកវិលទៅលេងប្រទេសកំណើតម្ដងៗ អារម្មណ៍របស់លោកនៅតែជាប់ជាមួយនឹងប្រទេសកម្ពុជាជានិច្ច៕
