រយៈពេល ២ឆ្នាំហើយ ដែលយុវជនជនជាតិមីយ៉ាន់ម៉ា Pyae Phyo Paing បានចាកចេញពីស្រុកកំណើត មកបំពេញការងារជាបុគ្គលិកសណ្ឋាគារមួយកន្លែង ក្នុងរាជធានីភ្នំពេញ។ ប៉ុន្តែ អ្វីដែលគួរចាប់អារម្មណ៍នោះគឺ ក្រៅពីម៉ោងការងារផ្លូវការ រូបគេបានចំណាយពេល ចូលហ្វឹកហាត់គុនខ្មែរ នៅក្លិបប្រដាល់មួយក្នុងសង្កាត់ទួលទំពូង រហូតមានឱកាសឡើងប្រកួតទាំងក្នុងកម្មវិធីកម្រិតស្ម័គ្រចិត្ត InterClub និងសង្វៀនកម្រិតអាជីពទៀតផង។
ឆ្លើយតបជាមួយទឹកមុខញញឹម កីឡាករចិត្តស៊ូ Phyo Paing បានទម្លាយថា "៖ ខ្ញុំពិតជាស្រលាញ់ កីឡាប្រដាល់គុនខ្មែរខ្លាំងណាស់! នេះជាមូលហេតុដែលធ្វើឱ្យខ្ញុំខំប្រឹងហ្វឹកហាត់ និងតស៊ូឡើងប្រកួត បើទោះបីជាវាជាក្បាច់គុនដំបូងបង្អស់ក្នុងជីវិតដែលខ្ញុំបានស្គាល់ក៏ដោយ។"
មិនត្រឹមតែគុនខ្មែរមួយមុខនោះទេ មួយរយៈពេលចុងក្រោយនេះ យុវជនដដែលរូបនេះ បានពង្រីកមហិច្ឆតារបស់ខ្លួន ដោយចាប់ផ្តើមហ្វឹកហាត់ក្បាច់គុនមួយទៀត គឺ កីឡាប្រដាល់សកល នៅសាលហ្វឹកហាត់ជម្រើសជាតិ ក្នុងពហុកីឡដ្ឋានជាតិអូឡាំពិក។
ថ្មីៗនេះ រូបគេទើបតែបានបង្ហាញសមត្ថភាពលើកដំបូង នៅលើសង្វៀនប្រដាល់សកលប្រចាំខែ Dragon the Golden Ring ដោយបានតតាំងជាមួយកីឡាករជម្រើសជាតិកម្ពុជា វណ្ណា លីហៀង យ៉ាងស្វិតស្វាញ បើទោះបីជាលទ្ធផលចុងក្រោយ ចាញ់ពិន្ទុក៏ដោយ។
បន្ទាប់ពីចប់ការប្រកួតដ៏ជក់ចិត្តនោះ Phyo Paing ក៏បានសម្តែងការកោតសរសើរមិនដាច់ពីមាត់ ចំពោះបច្ចេកទេស និងសមត្ថភាពដ៏ខ្លាំងក្លារបស់កីឡាករកម្ពុជា វណ្ណា លីហៀង ផងដែរ។
ក្រៅពីគុនខ្មែរ និងប្រដាល់សកលហើយនោះ Phyo Paing បានបង្ហើបថា ខ្លួនក៏ចូលចិត្តកីឡាគុនចម្រុះ (MMA), តេក្វាន់ដូ និង Kickboxing ខ្លាំងណាស់ដែរ៕
