ភ្នំពេញ៖ ឯកឧត្តម ជា បូរ៉ា អគ្គលេខាធិការសហព័ន្ធកីឡាវាយកូនគោលកម្ពុជា និងជាតំណាងដ៏ខ្ពង់ខ្ពស់ឯកឧត្តម ឧបនាយករដ្ឋមន្ត្រី ទៀ សីហា ប្រធានសហព័ន្ធកីឡាវាយកូនគោលកម្ពុជា បានអញ្ជើញជាគណៈអធិបតីក្នុងពិធីចុះហត្ថលេខាលើកិច្ចព្រមព្រៀងភាពជាដៃគូរវាង សមាគមកីឡាវាយកូនគោលអាជីព (PGA) និង Chhun On Golf Resort ដើម្បីរួមគ្នាអភិវឌ្ឍធនធានមនុស្សក្នុងវិស័យកីឡាវាយកូនគោលកម្ពុជា ឆ្ពោះទៅកាន់ស្តង់ដារអន្តរជាតិ នាពេលអនាគត។
ក្នុងឱកាសនោះ ឯកឧត្តម ជា បូរ៉ា បានចាត់ទុកកិច្ចសហការនេះថា ជាជំហានថ្មីដ៏សំខាន់មួយសម្រាប់វិស័យកីឡាវាយកូនគោលកម្ពុជា ដែលនឹងជួយពង្រឹងការអភិវឌ្ឍធនធានកីឡាករ កីឡាការិនី និងយុវជនថ្នាល ឱ្យមានសមត្ថភាពគ្រប់គ្រាន់ក្នុងការប្រកួតប្រជែងលើឆាកអន្តរជាតិ។
ឯកឧត្តមបានបញ្ជាក់ថា កិច្ចព្រមព្រៀងភាពជាដៃគូជាមួយ PGA មិនត្រឹមតែផ្តល់ឱកាសក្នុងការនាំយកអ្នកជំនាញ និងកម្មវិធីបណ្តុះបណ្តាលកម្រិតអន្តរជាតិមកកម្ពុជាប៉ុណ្ណោះទេ ប៉ុន្តែក៏អាចជួយទាក់ទាញព្រឹត្តិការណ៍កីឡាវាយកូនគោលធំៗ និងភ្ញៀវទេសចរកីឡាវាយកូនគោលពីជុំវិញពិភពលោកមកកាន់កម្ពុជាផងដែរ។
ចំពោះ Chhun On Golf Resort ដែលមានផ្ទៃដីជិត ១០០ហិកតា និងត្រូវបានរចនាឡើងដោយបញ្ចូលអត្តសញ្ញាណស្ថាបត្យកម្មខ្មែរ ត្រូវបានចាត់ទុកថា ជាទីលានវាយកូនគោលមួយដែលមានសក្តានុពល និងស្តង់ដារអន្តរជាតិ។ ការចាប់ដៃគូជាមួយ PGA នាពេលនេះ ក៏ជាការបង្ហាញទៅកាន់សហគមន៍កីឡាវាយកូនគោលពិភពលោកថា កម្ពុជា មានសមត្ថភាពក្នុងការរៀបចំព្រឹត្តិការណ៍កីឡាវាយកូនគោលកម្រិតអន្តរជាតិផងដែរ។
ជំហានដំបូងនៃកិច្ចសហការនេះ នឹងផ្តោតលើការនាំយកគ្រូបង្វឹក និងអ្នកជំនាញកីឡាវាយកូនគោលលំដាប់ពិភពលោកមកបណ្តុះបណ្តាលដល់កីឡាករ កីឡាការិនី និងយុវជនថ្នាលកម្ពុជា ដើម្បីលើកកម្ពស់ជំនាញបច្ចេកទេស និងសមត្ថភាពប្រកួតប្រជែងឱ្យកាន់តែប្រសើរ។
លោក Duncan Rougvie ប្រធានផ្នែកពាណិជ្ជកម្មរបស់ PGA បានមានប្រសាសន៍ថា PGA នឹងបន្តពិភាក្សាជាមួយ Chhun On Golf Resort និងសហព័ន្ធកីឡាវាយកូនគោលកម្ពុជា ដើម្បីវាយតម្លៃតម្រូវការជាក់ស្តែង សំដៅរៀបចំផែនការនាំយកគ្រូបង្វឹកជំនាញអន្តរជាតិមកបណ្តុះបណ្តាលអត្តពលិកវ័យក្មេង និងពង្រឹងគុណភាពគ្រូបង្វឹកកម្ពុជា។
លោកបានបន្ថែមថា PGA មានបំណងជួយបង្កើនសមត្ថភាពអត្តពលិកកម្ពុជា ឱ្យអាចប្រកួតប្រជែងក្នុងកម្រិតខ្ពស់ជាងមុន និងមានលទ្ធភាពចូលរួមព្រឹត្តិការណ៍អន្តរជាតិនានា។ ទន្ទឹមនឹងនេះ PGA ក៏សិក្សាពីលទ្ធភាពនាំយកព្រឹត្តិការណ៍កីឡាវាយកូនគោលដែលមានការទទួលស្គាល់ជាអន្តរជាតិ មករៀបចំនៅកម្ពុជានាពេលអនាគតផងដែរ។
ដោយឡែក ឧកញ៉ា ឈុន ចេតនា អគ្គនាយក Chhun On Golf Resort បានលើកឡើងថា ការចុះហត្ថលេខាលើកិច្ចព្រមព្រៀងភាពជាដៃគូជាមួយ PGA គឺជាជំហានដ៏មានសារៈសំខាន់ក្នុងការផ្សព្វផ្សាយ និងលើកកម្ពស់កេរ្តិ៍ឈ្មោះវិស័យកីឡាវាយកូនគោលកម្ពុជាទៅកាន់ពិភពលោក។
ឧកញ៉ាបានបញ្ជាក់ថា ទោះបីកម្ពុជាទើបចាប់ផ្តើមអភិវឌ្ឍវិស័យកីឡាវាយកូនគោលក្នុងរយៈពេលមិនយូរប៉ុន្មានក៏ដោយ ប៉ុន្តែកម្ពុជាបានបង្ហាញពីសមត្ថភាពក្នុងការបង្កើតទីលានវាយកូនគោលដែលមានគុណភាព និងស្តង់ដារអន្តរជាតិ។
កិច្ចសហការជាមួយ PGA នឹងក្លាយជាកម្លាំងចលករដ៏សំខាន់មួយក្នុងការអភិវឌ្ឍវិស័យកីឡាវាយកូនគោលកម្ពុជា តាមរយៈការបណ្តុះបណ្តាលធនធានមនុស្ស ការពង្រឹងសមត្ថភាពកីឡាករ និងការបង្កើតឱកាសឱ្យអត្តពលិកកម្ពុជាឈានទៅប្រកួតប្រជែងលើឆាកអន្តរជាតិនាពេលអនាគត៕
