កីឡាករចំបាប់លេចធ្លោរបស់កម្ពុជា ហេង វុទ្ធី បានរំឭកថា នៅពេលចូលប្រឡូកក្នុងវិស័យកីឡាចំបាប់ដំបូង កាលពីឆ្នាំ២០១៤ រូបគេគ្រាន់តែចង់មានឱកាសចេញទៅប្រកួតនៅក្រៅប្រទេសប៉ុណ្ណោះ ដោយមិនសូវផ្ដោតលើជ័យជម្នះឡើយ។ អ្វីដែលសំខាន់សម្រាប់គេនៅពេលនោះ គឺការបានជិះយន្តហោះទៅប្រកួតនៅបរទេស។ ប៉ុន្តែ ក្រោយទទួលបានលទ្ធផលល្អជាបន្តបន្ទាប់ វាបានក្លាយជាកម្លាំងចិត្តជំរុញឱ្យរូបគេខិតខំប្រឹងប្រែងកាន់តែខ្លាំង រហូតក្លាយជាកីឡាករឆ្នើមមួយរូបក្នុងក្រុមជម្រើសជាតិកម្ពុជា។
កីឡាករមានស្រុកកំណើតនៅខេត្តពោធិ៍សាត់រូបនេះបានថ្លែងថា៖«និយាយទៅ ខ្ញុំចូលមកហាត់កីឡាចំបាប់ គ្រាន់តែចង់បានឱកាសជិះយន្តហោះទៅប្រកួតនៅក្រៅប្រទេសប៉ុណ្ណោះ។ ខ្ញុំមិនបានគិតរឿងចាញ់ ឬឈ្នះអ្វីទេ ធ្វើយ៉ាងណាឱ្យតែបានទៅប្រកួតនៅក្រៅ។ ប៉ុន្តែ បន្ទាប់ពីខ្ញុំទទួលបានជ័យជម្នះ ២ ទៅ ៣ ដង ខ្ញុំក៏ចាប់ផ្ដើមមានទឹកចិត្តប្រឹងប្រែងកាន់តែខ្លាំង ដើម្បីលើកមុខមាត់ និងនាំមោទនភាពជូនប្រទេសកម្ពុជាលើឆាកអន្តរជាតិ»។
ក្នុងអាជីពកីឡាចំបាប់ជាង ១០ ឆ្នាំ ប្រកបដោយភាពជោគជ័យមកនេះ ហេង វុទ្ធី ទទួលបានផ្លែផ្កាជាច្រើនសម្រាប់ជីវភាពរស់នៅ ដោយមានលទ្ធភាពទិញម៉ូតូ រថយន្ត ដីធ្លី ផ្ទះសម្បែង ព្រមទាំងទទួលបានក្របខណ្ឌជានគរបាលជាតិថែមទៀត។
អ្នកប្រយុទ្ធវ័យជាង ៣០ ឆ្នាំរូបនេះ ក៏បានលើកទឹកចិត្តដល់កីឡាករ-កីឡាការិនីជំនាន់ក្រោយ និងអ្នករួមអាជីពកីឡាទាំងអស់ ឱ្យចេះសន្សំប្រាក់ និងរៀបចំផែនការហិរញ្ញវត្ថុសម្រាប់អនាគត ជាពិសេសនៅពេលត្រូវបញ្ចប់អាជីពកីឡាដោយប្រការណាមួយ។
ក្រៅពីសមិទ្ធផលជាច្រើននៅលើឆាកអន្តរជាតិ ហេង វុទ្ធី ក៏ជាម្ចាស់មេដាយមាសក្នុងព្រឹត្តិការណ៍កីឡាស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ។
ថ្មីៗនេះ រូបគេបានបើកសម្ពោធជាផ្លូវការនូវក្លិបកីឡាចំបាប់ផ្ទាល់ខ្លួនមួយនៅលើទឹកដីកំណើត ខេត្តពោធិ៍សាត់ ក្រោមឈ្មោះ «ក្លិបចំបាប់ព្រះធាតុ» ក្នុងគោលបំណងបណ្ដុះបណ្ដាល និងអភិវឌ្ឍធនធានកីឡាករវ័យក្មេងជំនាន់ក្រោយបន្តវេន៕
