ក្រោយដំណើរការអស់រយៈពេល៣ថ្ងៃ ការប្រកួតកីឡាវាយសីប្រចាំព្រឹត្តិការណ៍កីឡាឧត្ដមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៦ បានបិទបញ្ចប់ជាផ្លូវការហើយនៅទីលានកីឡាវាយសីនៃពហុកីឡដ្ឋានជាតិអូឡាំពិក នាព្រឹកថ្ងៃសៅរ៍ ទី១៣ ខែមិថុនា នេះ។
ជាលទ្ធផលក្រុមសាកលវិទ្យាល័យវេស្ទើន ដណ្ដើមបានមេដាយសរុប៦គ្រឿង ដែលមានមាស៣គ្រឿង ប្រាក់២គ្រឿង និងសំរឹទ្ធ ១គ្រឿង សរុប៦គ្រឿង ឈរលើគេក្នុងតារាងមេដាយសរុប។ ចំណាត់ថ្នាក់លេខ២បានទៅលើក្រុមវិទ្យាស្ថានខ្មែរជំនាន់ថ្មី ដែលបានមេដាយមាស១ និងប្រាក់៣ សរុប៤គ្រឿង។
វិទ្យាស្ថាន ខេមអេដ ឈរនៅលេខ៣ បានមេដាយមាស១ និងសំរឹទ្ធ ១ សរុប២គ្រឿង។ ជាមួយគ្នានេះ ក្រុមសាកលវិទ្យាល័យអន្តរជាតិផារ៉ាហ្គន ទទួលបានមេដាយសំរឹទ្ធ២គ្រឿង និង សាកលវិទ្យាល័យអាមេរិកាំងភ្នំពេញ ទទួលបានមេដាយសំរឹទ្ធ១គ្រឿង។ ក្រៅពីនេះ សាកលវិទ្យាល័យជាតិគ្រប់គ្រង វិទ្យាស្ថានបច្ចេកទេសវិទ្យាកម្ពុជា និងសាកលវិទ្យាលល័យពុទ្ធិសាស្ត្រ ពុំទទួលបានមេដាយឡើយ។
បើតាមរបាយការណ៍ ឯកឧត្ដម កែវ រស់ អគ្គលេខាធិការសហព័ន្ធកីឡាវាយសីកម្ពុជា ការប្រកួតកីឡាវាយសីប្រចាំព្រឹត្តិការណ៍កីឡាឧត្ដមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៦ មានសាកលវិទ្យាល័យ និងវិទ្យាស្ថានចូលរួមចំនួន៨ និងកីឡាករ កីឡាការិនីសរុប៦៨នាក់ ប្រកួតប្រជែងលើ៥វិញ្ញាសា គឺ វាយគូបុរស វាយគូនារី វាយគូចម្រុះបុរសនារី វាយទោលបុរស និងវាយទោលនារី។
ឆ្លៀតក្នុងឱកាសនៃពិធីបិទការប្រកួតនេះដែរ ឯកឧត្ដម កុសល សុវណ្ណវិសាល អនុប្រធានសហព័ន្ធកីឡាវាយសីកម្ពុជា បានផ្ដាំផ្ញើដល់កីឡាករ កីឡាការិនីទាំងអស់ ទោះបីដណ្ដើមបានមេដាយក្ដី ឬមិនបានក្ដី ត្រូវតែប្ដេជ្ញាចិត្តហ្វឹកហាត់ឱ្យបានទៀងទាត់ជាប្រចាំ ដើម្បីអភិវឌ្ឍខ្លួនក្លាយជាកីឡាករឆ្នើមមានសិទ្ធផលខ្ពស់ ក្នុងការប្រកួតលក្ខណៈជាតិ និងអន្តរជាតិ ដណ្ដើមយកមេដាយមាសជូនជាតិមាតុភូមិជាបន្តទៀត៕
