កីឡាករជឺជីតស៊ូជម្រើសជាតិកម្ពុជា មឿនលីម សុបញ្ញា បានឈ្នះមេដាយប្រាក់ក្នុងការប្រកួតកីឡាប្រយុទ្ធជើងឯកសាកលវិទ្យាល័យពិភពលោក FISU ឆ្នាំ២០២៦ នៅទីក្រុងប្រាស៊ីលីយ៉ា ប្រទេសប្រេស៊ីល នាថ្ងៃព្រហស្បតិ៍ ទី១១ ខែមិថុនា នេះ ។
មុនឈានទៅទទួលបានតំណែងជើងឯករងក្នុងប្រភេទទម្ងន់-៧៧គីឡូក្រាម កីឡាករឆ្នើមលេចធ្លោកម្ពុជាបានឈ្នះកីឡាករអាល្លឺម៉ង់សុំចុះចាញ់ដោយក្លេដៃ ត្រឹមរយៈពេល ១នាទី និង២០វិនាទី។
ក្នុងការប្រកួតទី២របស់ខ្លួន យុវជនវ័យ២១ឆ្នាំបានប្រើបច្ចេកទេសដ៏ពិសេសដដែល ផ្តួលកីឡាករថៃចុះចាញ់ ក្នុងរយៈពេល ៣នាទី និង ៣៦វិនាទី។
តែគួរឱ្យស្ដាយ ក្នុងវគ្គផ្ដាច់ព្រ័ត្រដណ្ដើមមេដាយមាស បញ្ញា បានចាញ់ម្ចាស់ផ្ទះប្រេស៊ីលក្នុងពិន្ទុយ៉ាងផុតផើយ ឈានទៅទទួលបានត្រឹមមេដាយប្រាក់។
មឿនលីម សុខបញ្ញា បានថ្លែងថាគោលដៅរបស់គេគឺយកមេដាយមាសមកផ្ទះវិញ ប៉ុន្តែគេបានបង្កើតកំហុសខ្លះនៅវគ្គផ្តាច់ព្រ័ត្រ។ ទោះបីជាយ៉ាងណា គេនឹងរៀនពីបទពិសោធដ៏សំខាន់នេះ ហើយត្រលប់មកវិញឱ្យកាន់តែរឹងមាំសម្រាប់ការប្រកួតបន្ទាប់។
ជាមួយគ្នានេះ សហព័ន្ធកីឡាជឺជីតស៊ូកម្ពុជា បានចូលរួមអបអរសាទរចំពោះការបង្ហាញសមត្ថភាពដ៏លេចធ្លោ និងមេដាយប្រាក់ជើងឯកពិភពលោកដ៏ស័ក្តិសមសម្រាប់ជាតិមាតុភូមិ។
សូមជម្រាបជូនថា រដូវកាលនៃការប្រកួតអន្តរជាតិនៅតែបន្ត ដោយសុបញ្ញានឹងតំណាងកម្ពុជាម្តងទៀតនៅខែក្រោយក្នុងការប្រកួតធំៗនៅប្រទេសជប៉ុន និង កាហ្សាក់ស្ថាន៕
