ក្លិបកីឡាចំបាប់ទី១លើទឹកដីខេត្តពោធិ៍សាត់គឺ ក្លិបកីឡាចំបាប់ព្រះធាតុ បានលេចរូបរាងឡើង ជាផ្លូវការនៅថ្ងៃទី០៥ ខែមិថុនា ឆ្នាំ២០២៦ ដោយមានទីតាំងនៅភូមិឥន្ធធ្យា ឃុំស្រែស្ដុក ស្រុកកណ្ដៀង ខេត្តពោធិ៍សាត់ ក្នុងគោលបំណងចូលរួមបណ្ដុះបណ្ដាលធនធានកីឡាករ កីឡាការិនីជាធនធានបន្តវេន ក៏ដូចជារួមចំណែកអភិរក្ស និងអភិវឌ្ឍកីឡាអត្តសញ្ញាណជាតិមួយនេះផងដែរ។
នេះក៏ជាចក្ខុវិស័យដ៏សំខាន់មួយរបស់សហព័ន្ធកីឡាចំបាប់កម្ពុជា ក្នុងការពង្រីកសក្ដានុពលទៅតាមខេត្តដើម្បី បណ្ដុះបណ្ដាលនូវបច្ចេកទេស និង សាបព្រោះថ្នាលកីឡាករ-កីឡាការិនីនៅទូទាំងប្រទេស ឈានឆ្ពោះទៅត្រៀមការប្រកួតថ្នាក់ជាតិ-អន្ដរជាតិនានា ពិសេសកីឡាយុវជនអាស៊ី នាឆ្នាំ២០៣១ ដែលកម្ពុជាធ្វើជាម្ចាស់ផ្ទះ។
ក្នុងពិធីសម្ពោធកីឡាចំបាប់ព្រះធាតុនេះ ក៏មានការរៀបចំនូវការប្រកួតកីឡាចំបាប់ថ្នាក់ខេត្ត ឆ្នាំ២០២៦ ដោយមានការចូលរួមពីកីឡាករ-កីឡាការិនីវ័យក្មេងជាច្រើន។
ក្នុងនោះ លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជាតំណាងឯកឧត្ដមប្រធាន វ៉ាត់ ចំរើន ក៏បានឧបត្ថម្ភថវិកា ២លានរៀល សម្រាប់ទ្រទ្រង់ក្លិប និងផ្ដល់នូវសម្ភារមួយចំនួនទៀតពីសហព័ន្ធផងដែរ៕
