ចំនួនក្រុមសិស្សានុសិស្សដែលបានចូលរួមការប្រកួតកីឡាចំបាប់ប្រចាំព្រឹត្តិការណ៍កីឡាសិស្សបឋមសិក្សាជើងឯកថ្នាក់ជាតិ ឆ្នាំ២០២៦ មានដល់ទៅ១០រាជធានីខេត្ត និងកុមារា កុមារី ជាង៤០នាក់។ នេះបើតាមការឱ្យដឹងពីលោក Casey Barnett អនុប្រធានសហព័ន្ធកីឡាចំបាប់កម្ពុជា។
ថ្នាក់ដឹកនាំដដែលសង្កត់ធ្ងន់ថា កត្តារួមចំណែកធ្វើឱ្យមានកំណើនចូលរួមកាន់តែច្រើនបែបនេះ ដោយសារតែសហព័ន្ធបានពង្រីក និងបង្កើតសាលហ្វឹកហាត់បន្ថែមជាបន្តបន្ទាប់។ ជាក់ស្ដែង នៅខេត្តពោធិ៍សាត់ និងខេត្តកំពង់ឆ្នាំង មានសាលហ្វឹកហាត់ធំថ្មីមួយ ស្របពេលនៅឃុំវិហាសួគ៌ ខេត្តកណ្ដាល ក៏កំពុងរៀបចំកន្លែងហ្វឹកហាត់ថ្មី ហើយសហព័ន្ធបានផ្ដល់កម្រាលហ្វឹកហាត់ ក៏ដូចជាគ្រូៗដែលជាអតីតកីឡាករកីឡាការិនីជម្រើសជាតិបានចូលរួមបង្ហាត់នៅទឹកដីកំណើតខ្លួន។
លោក Casey Barnett បន្តថា ការហ្វឹកហាត់កីឡាតាំងពីក្មេងពិតជាសំខាន់ដើម្បីស្រូបទាញមូលដ្ឋានគ្រឹះ និងបច្ចេកទេសបានច្រើន។ ទន្ទឹមនឹងនេះ កុមារា កុមារី ហ្វឹកហាត់កីឡាចំបាប់ក៏បានចូលរួមអភិរក្ស និងលើកស្ទួយកីឡាប្រពៃណីជាតិខ្មែរ ហើយការចូលរួមប្រកួតសិស្សបឋមសិក្សា បានផ្ដល់នូវបទពិសោធ និងភាពសប្បាយរីករាយដល់ពួកគេផងដែរ។
សូមជម្រាបថា ការប្រកួតកីឡាចំបាប់ប្រចាំព្រឹត្តិការណ៍សិស្សបឋមសិក្សាថ្នាក់ជាតិ ឆ្នាំ២០២៦ ប្រព្រឹត្តទៅពីថ្ងៃទី១ដល់ថ្ងៃទី៤ ខែឧសភា នាសាលកីឡាចំបាប់នៃពហុកីឡដ្ឋានជាតិអូឡាំពិក ដោយមាន៤ប្រភេទវិញ្ញាសា គឺចំបាប់សេរី កុមារា (-៣៥គីឡូក្រាម) និង (-៤១គីឡូក្រាម) ចំបាប់សេរី កុមារី (-៣០គីឡូក្រាម) និង (-៣៨គីឡូក្រាម)។ ជាលទ្ធផល ក្រុមកីឡាចំបាប់រាជធានីភ្នំពេញឈរលើគេក្នុងតារាងមេដាយដោយទទួលបាន មេដាយមាស២ និង សំរឹទ្ធ១៕
