ការប្រកួតកីឡាអុកចត្រង្គនគរសង្រាន្ដ ២០២៦ និងការបង្ហាញក្បាច់គុនចម្រុះបុរាណខ្មែរ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ទទួលបានកំណើនទស្សនាយ៉ាងច្រើនកុះករទាំងនៅកន្លែងប្រកួតផ្ទាល់ និងអនឡាញ។ នេះបើតាមប្រសាសន៍ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា។
ឯកឧត្ដម វ៉ាត់ ចំរើន សង្កត់ធ្ងន់ថា សម្រាប់ប្រភេទកីឡាអុកចត្រង្គ គុណភាពសមត្ថភាពកីឡាករក៏មានកំណើនដូចគ្នា ទាំងកម្រិតកុមារា និងមនុស្សពេញវ័យ។ ជាក់ស្ដែងទម្រាំរកឃើញបេក្ខជនឡើងវគ្គផ្ដាច់ព្រ័ត្រ ពិតជាស្វិតស្វាញខ្លាំង ហើយមានគូស្មើគ្នាច្រើនថែមទៀត។ ឯកឧត្ដមសង្ឃឹមថា នៅឆ្នាំក្រោយៗនឹងមានការចូលរួមកាន់តែច្រើនជាងនេះទៀត ខណៈប្រភេទល្បែងប្រើបញ្ញាស្មារតីដែរនោះ ដូចជា រែក ខ្លាស៊ីគោ បាយខុន ជាដើម អាចនឹងត្រូវបានបន្ថែមចូលក្នុងការប្រកួតអុកចត្រង្គ។
ជុំវិញកីឡាយុទ្ធគុនចម្រុះខ្មែរបុរាណដែលត្រូវបានបង្ហាញជាលើកទី២ បន្ទាប់ពីអង្គរសង្ក្រាន្ដក្នុងខេត្តសៀមរាបនោះ ទទួលបានការទស្សនាគាំទ្រដោយផ្ទាល់យ៉ាងផុសផុលនៅភូមិវប្បធម៌នគរសង្ក្រាន្ដ។ ការបង្ហាញក្បាច់គុនមរតកជាតិនេះក៏ទទួលបានការគាំទ្រ ជំរុញ និងលើកទឹកចិត្តដោយផ្ទាល់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្ដម វ៉ាត់ ចំរើន បន្តថា គណៈកម្មាធិការជាតិអូឡាំពិកកម្ពុជា និង ក្រុមស្រាវជ្រាវគម្ពីអាថ៌កំបាំងដូនតាខ្មែរ នឹងអាចបញ្ចូលល្បែងរបាំប្រជាប្រិយមួយចំនួនទៀតដែលប្រើកម្លាំង មានដូចជា ចំបាប់បុរាណ រុញអង្រែ ជាដើម ចូលក្នុងព្រឹត្តិការណ៍នគរសង្ក្រាន្ដឆ្នាំក្រោយទៀតដើម្បីឱ្យមានភាពសម្បូរបែប ហើយភ្ញៀវទេសចរបរទេសក៏អាចចូលរួមលេងបាន៕
