ភ្នំពេញ៖ គណៈកម្មាធិការជាតិអូឡាំពិកកម្ពុជា (NOCC) បានចុះអនុស្សារណៈនៃយោគយល់គ្នា ជាមួយផលិតកម្ម Sastra Film ដែលជាផលិតកម្មឈានមុខ មានស្មាដៃក្នុងការផលិតសាច់រឿង និងឯកសាររស់ដ៏មានលក្ខណៈពិសេស អំពីការត្រៀមខ្លួនរបស់អត្តពលិកកីឡាកម្ពុជា លើវិថីឆ្ពោះទៅកីឡាអូឡាំពិក ឆ្នាំ២០២៨។ អនុស្សារណៈនៃការយោគយល់គ្នានេះ បានធ្វើឡើងនារសៀលថ្ងៃទី២៧ ខែមីនា ឆ្នាំ២០២៦។
ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) បានគូសបញ្ជាក់ឱ្យដឹងថា អនុស្សារណៈនៃការយោគយល់គ្នា ដែល NOCC បានចុះជាមួយផលិតកម្ម Sastra Film បានធ្វើឡើងក្នុងគោលបំណងគាំទ្រដំណើរឆ្ពោះទៅព្រឹត្តិការណ៍កីឡាអូឡាំពិកឆ្នាំ២០២៨ នៅទីក្រុងLA រដ្ឋឡូសអាន់ជ័រលេស សហរដ្ឋអាម៉េរិក។
ឯកឧត្តម អគ្គលេខាធិការ បានបញ្ជាក់ទៀតថា អនុស្សារណៈនៃភាពជាដៃគូជួយគ្នាទៅវិញទៅមកនេះ គឺជាប្រតិបត្តិការរួមគ្នាដើម្បីស្វែងរកការឧបត្ថម្ភគាំទ្រពីបណ្តាក្រុមហ៊ុនដៃគូផ្សេងៗ ជួយដល់ការត្រៀមលក្ខណៈរបស់អត្តពលិកកីឡាកម្ពុជាក្នុងការពង្រឹងសមត្ថភាពឈានទៅដណ្តើមជោគជ័យក្នុងព្រឹត្តិការណ៍ដ៏ធំមួយនេះ។
កិច្ចសហការក្រោមការចុះអនុស្សារណៈមួយនេះ ផលិតកម្ម Sastra Film នឹងជួយផលិតឯកសារនានា និងសាច់រឿងមួយចំនួនខ្លីៗ ស្តីពីសកម្មភាពហ្វឹកហាត់ការត្រៀមខ្លួនរបស់អត្តពលិកកីឡាយើងក្នុងដំណើរឆ្ពោះទៅកាន់ព្រឹត្តិការណ៍កីឡាលំដាប់ពិភពលោកដ៏ធំ ដែលសហរដ្ឋអាម៉េរិក ធ្វើជាម្ចាស់ផ្ទះ ឆ្នាំ២០២៨ ដើម្បីស្វែងរកឱ្យមានការចូលរួមជាវិភាគទានទាំងថ្នាក់ជាតិនិងអន្តរជាតិ ជាស្មារតីសម្ភារៈ និងថវិកាជាដើម។
សូមបញ្ជាក់ថា ក្នុងដំណើរឆ្ពោះទៅក្នុងព្រឹត្តិការណ៍កីឡាអូឡាំពិក ដែលសហរដ្ឋអាម៉េរិកទទួលធ្វើជាម្ចាស់ផ្ទះ ឆ្នាំ២០២៨ខាងនេះ គណៈកម្មាធិការជាតិអូឡាំពិកកម្ពុជា បានបន្តចុះអនុស្សារណៈនៃយោគយលគ្នាជាមួយក្រុមហ៊ុនទាំងក្នុងស្រុក និងក្រៅប្រទេស ដើម្បីស្វែងរកការឧបត្ថម្ភគាំទ្រដល់អត្តពលិកក្នុងហ្វឹកហាត់ត្រៀមខ្លួន ដើម្បីមានសមត្ថភាពគ្រប់គ្រាន់ឆ្ពោះទៅប្រកួតប្រជែងដណ្តើមយកជ័យជម្នះជូនជាតិ។
ជាក់ស្តែងអនុស្សារណៈនៃការយោគយល់គ្នា ជាមួយផលិតកម្ម Sastra Film នឹងបង្កើតជាវីដេអូខ្លីៗ ដែលមានភាពទាក់ទាញបង្ហាញអំពីការប្តេជ្ញាចិត្តតស៊ូព្យាយាម អត់ធ្មត់ និងការលះបង់របស់កីឡាករ កីឡាការិនីយើង ដែលជាការត្រៀមខ្លួនទៅប្រកួតប្រជែងដណ្តើមមេដាយដើម្បីជាតិក្នុងព្រឹត្តិការណ៍អូឡាំពិក៕
