ឯកឧត្ដម វ៉ាត់ ចំរើន ដែលទើបត្រូវបានជ្រើសជាប្រធានសហព័ន្ធគុនខ្មែរអន្តរជាតិមានប្រសាសន៍ថា មហាសន្និបាតរបស់សហព័ន្ធកាលថ្ងៃព្រហស្បតិ៍ ទី១២ ខែកុម្ភៈ ឆ្នាំ២០២៦ បានបង្ហាញពីរបត់ថ្មីដោយបានធ្វើសមាហរណកម្ម និងឯកភាពជាតិ ជាពិសេសរវាងគុនខ្មែរជាតិ និងគុនខ្មែរអន្តរជាតិ ។
ឯកឧត្ដមរដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជាបន្ថែមថា គោលបំណងធំមួយទៀត គឺមហាសន្និបាតបានជំរុញឱ្យមានការបង្រួបបង្រួមរវាងសមាជិកទាំងអស់ និងបង្ហាញពីភាពរឹងមាំដល់ប្រទេសសមាជិកដែលមានជាង៦០ប្រទេស កាន់តែមានភាពជឿជាក់ ក្នុងគោលដៅពង្រីកវិសាលភាពគុនខ្មែរលើឆាកអន្តរជាតិកាន់តែធំឡើង ក៏ដូចជាឆ្ពោះទៅចូលរួមក្នុងចលនាអូឡាំពិកកាន់តែឆាប់រហ័ស។
ឯកឧត្ដម វ៉ាត់ ចំរើន បន្តបែបនេះ “៖ យើងបានរៀបចំរចនាសម្ព័ន្ធមួយដែលគួរឱ្យទុកចិត្ត និងមានសាមគ្គីភាពផ្ទៃក្នុងបានល្អ មានលទ្ធភាពសម្រេចការងារបានយ៉ាងជោគជ័យ មិនមានភាពចម្រូងចម្រាស មានឯកភាពជាតិពិតប្រាកដ ក្នុងគុនខ្មែរ និងដើរលើផ្លូវតែមួយ។ ទន្ទឹមនឹងនេះក៏មានការរៀបចំឱ្យមានទំនាក់ទំនង និងធ្វើការជាមួយគ្នាយ៉ាងស្អិតរមួត និងលើកទឹកចិត្តឱ្យប្រទេសជាសមាជិកទាំងអស់ធ្វើការឱ្យបានល្អជាងមុន ដោយមានទំនុកចិត្តពីអគ្គលេខាធិការដ្ឋានរបស់យើង។ អ្វីសំខាន់មួយទៀត គឺឯកឧត្ដម ខូវ ឆាយ ប្រធានសហព័ន្ធគុនខ្មែរ បានទទួលតួនាទីជាអគ្គលេខាធិការគុនខ្មែរអន្តរជាតិ ដែលជាសេនាធិការឱ្យគុនខ្មែរអន្តរជាតិ នេះជាចំណុចសំខាន់។ ទី២យើងបានតម្កល់ទុកនូវការដឹងគុណដល់អតីតប្រធាន គឺឯកឧត្ដមបណ្ឌិត មៀម រ៉ា ដែលត្រូវបានលើកតម្កើងទៅជាប្រធានស្ថាបនិក និងជាប្រធានកិត្តិយសសម្រាប់គុនខ្មែរអន្តរជាតិអស់មួយជីវិត។ គាត់ គឺជាមនុស្សដែលខ្ពស់បំផុតដែលត្រូវការការគោរពពីប្រទេសជាសមាជិកទាំងអស់ ព្រោះយើងដឹងហើយថា គុនខ្មែរ គឺជាអត្តសញ្ញាណជាតិរបស់យើង។”
ក្រោយទទួលបានប្រទេសធំៗដូចជា កាណាដា បារាំង អាមេរិក ចិន អូស្ត្រាលី ជាដើម ចូលរួមជាសមាជិកគុនខ្មែរអន្តរជាតិ ឯកឧត្ដម វ៉ាត់ ចំរើន ថ្លែងថា ក្នុងអាណត្តិថ្មី ២០២៦/២០៣០ សហព័ន្ធគុនខ្មែរអន្តរជាតិនឹងព្យាយាមពង្រីកសមាជិកភាពរបស់ខ្លួនឱ្យបានដល់៧៥ប្រទេសដែលអាចជំរុញឱ្យអូឡាំពិកទទួលស្គាល់ (IOC Recognition Member) មុនឆ្ពោះទៅស្នើសុំតាមនីតិវិធីផ្សេងៗដើម្បីក្លាយជាប្រភេទកីឡានៅអូឡាំពិក។ នៅពេលប្រទេសធំៗដែលជាសមាជិកគុនខ្មែរអន្តរជាតិ ធ្វើជាម្ចាស់ផ្ទះអូឡាំពិក នោះពួកគេអាចនឹងមានសិទ្ធិដាក់ចូលជាប្រភេទកីឡាសម្រាប់ការប្រកួត។
សូមជម្រាបជូនថា ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំយុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិក ត្រូវបានអង្គមហាសន្និបាត នៃសហព័ន្ធកីឡាគុនខ្មែរអន្តរជាតិ ជ្រើសតាំងជាប្រធានសហព័ន្ធ អាណត្តិទី៧ ឆ្នាំ២០២៦-ឆ្នាំ២០៣០៕
