នៅព្រឹកថ្ងៃចន្ទ ទី១៩ ខែមករា ឆ្នាំ២០២៦ ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានចូលរួមពិធីចុះកិច្ចព្រមព្រៀងសហការជាមួយធនាគារ ABA លើយុទ្ធនាការស្វែងរកការឧបត្ថម្ភគាំទ្រដល់អត្តពលិកកម្ពុជាក្នុងដំណើរឆ្ពោះទៅចូលរួមព្រឹត្តិការណ៍កីឡាអូឡាំពិក ឆ្នាំ២០២៨ នៅក្រុង Los Angeles រដ្ឋ California សហរដ្ឋអាមេរិក។
ឯកឧត្ដម វ៉ាត់ ចំរើន មានប្រសាសន៍ថា ក្នុងកិច្ចសហប្រតិបត្តិការគ្នានេះ ធនាគារ ABA នឹងបង្កើតគណនីសម្រាប់គណៈកម្មាធិការជាតិអូឡាំពិកកម្ពុជាដើម្បីទទួលការចូលរួមឧបត្ថម្ភពីក្រុមហ៊ុន និងមហាជននានា។ ទន្ទឹមនឹងនេះ ABA ក៏នឹងអំពាវនាវដល់អតិថិជនរបស់ខ្លួន និងក្រុមហ៊ុនផ្សេងៗទៀតបានគាំទ្រដល់បេសកកម្មនេះដែរ។
ឯកឧត្ដមអគ្គលេខាធិការ NOCC បញ្ជាក់បន្ថែមថា ក្នុងកិច្ចសហប្រត្តិការនេះ ABA នឹងជួយឱ្យដំណើរការស្វែងរកការឧបត្ថម្ភប្រព្រឹត្តទៅប្រកបដោយតម្លាភាពទៅដល់អ្នកចូលរួមទាំងមហាជន និងក្រុមហ៊ុនឧបត្ថម្ភគាំទ្រនានា។ ABA ក៏ជាក្រុមហ៊ុនដំបូងដែលបានចូលរួមគាំទ្រដល់យុទ្ធនាការរៃអង្គាស និងការចូលរួមគាំទ្រដល់ក្រុមអត្តពលិកកម្ពុជាក្នុងការត្រៀមទៅចូលរួមព្រឹត្តិការណ៍កីឡាអូឡាំពិកឆ្នាំ២០២៨។
សូមរំឭកថា កាលពីថ្ងៃទី១៤ ខែមករា ឆ្នាំ២០២៦កន្លងទៅ គណៈកម្មាធិការជាតិអូឡាំពិក និង សភាពាណិជ្ជកម្មអាមេរិកប្រចាំកម្ពុជា (AmCham) បានចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីការប្រកាសបើកយុទ្ធនាការសហការ និងស្វែងរក ការឧបត្ថម្ភសម្រាប់អត្តពលិកកម្ពុជាត្រៀមព្រឹត្តិការណ៍កីឡាអូឡាំពិក នាក្រុង Los Angeles រដ្ឋ California សហរដ្ឋអាមេរិក ឆ្នាំ២០២៨។ នេះជាការចាប់ផ្ដើមអនុវត្តកម្មវិធីប្រមូលថវិកាពីក្រុមហ៊ុនអាមេរិកមួយចំនួនក៏ដូចជាសប្បុរសជន និងក្រុមហ៊ុននានាដើម្បីគាំទ្រអត្តពលិកអូឡាំពិកកម្ពុជា៕
