នៅព្រឹកថ្ងៃពុធ ទី១៤ ខែមករា ឆ្នាំ២០២៦ គណៈកម្មាធិការជាតិអូឡាំពិក និង សភាពាណិជ្ជកម្មអាមេរិកប្រចាំកម្ពុជា (AmCham) បានចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីការប្រកាសបើកយុទ្ធនាការសហការ និងស្វែងរក ការឧបត្ថម្ភសម្រាប់អត្តពលិកកម្ពុជាត្រៀមព្រឹត្តិការណ៍កីឡាអូឡាំពិក នាក្រុង Los Angeles រដ្ឋ California សហរដ្ឋអាមេរិក ឆ្នាំ២០២៨។
កិច្ចសហប្រតិបត្តិការនេះធ្វើឡើងក្រោមអធិបតីភាពឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា លោក Casey Barnett ប្រធានសភាពពាណិជ្ជអាមេរិកប្រចាំព្រះរាជាណាចក្រកម្ពុជា និងលោក Benjamin Chiang ភារធារីស្តីទី នៃស្ថានទូតសហរដ្ឋអាមេរិកប្រចាំព្រះរាជាណាចក្រកម្ពុជា។
លោក Casey Barnett មានប្រសាសន៍ថា នេះជាការចាប់ផ្ដើមអនុវត្តកម្មវិធីប្រមូលថវិកាពីក្រុមហ៊ុនអាមេរិកមួយចំនួនក៏ដូចជាសប្បុរសជនដើម្បីគាំទ្រអត្តពលិកកម្ពុជាត្រៀមចូលរួមព្រឹត្តិការណ៍កីឡាអូឡាំពិកនាក្រុង Los Angeles រដ្ឋ California សហរដ្ឋអាមេរិក ឆ្នាំ ២០២៨។ ជាក់ស្ដែង ការហ្វឹកហាត់របស់អត្តពលិកសហរដ្ឋអាមេរិកក៏ទទួលបានពីវិស័យឯកជននានា ដោយមិនពឹងផ្អែកលើការឧបត្ថម្ភពីរដ្ឋាភិបាលទាំងស្រុងទេ។
ហេតុដូចនេះហើយបានជាលោកសង្ឃឹមថា កម្ពុជាអាចអនុវត្តតាមមធ្យោបាយដូចគ្នា គឺប្រមូលការគាំទ្រពីបណ្ដាក្រុមហ៊ុនដើម្បីកេរ្ដិ៍ឈ្មោះ និងជោគជ័យរបស់កម្ពុជា។ អ្នកជំនួញជនជាតិអាមេរិកសង្ឃឹមថា ការចូលរួមឧបត្ថម្ភនឹងជួយជំរុញអត្តពលិកចូលរួមប្រកួតកីឡាអូឡាំពិកដោយជោគជ័យ។ លោក Casey Barnett ក៏បានសរសើរគណៈកម្មាធិការជាតិអូឡាំពិកកម្ពុជាដែលបានគាំទ្រកីឡាករ កីឡាការិនីកម្ពុជាយ៉ាងខ្លាំងសម្រាប់ជោគជ័យនៅអូឡាំពិក។ ការចូលរួមឧបត្ថម្ភ គឺនឹងផ្ដោតលើប្រភេទកីឡាមានសក្ដានុពលសង្ឃឹមបានជោគជ័យនៅអូឡាំពិក ដែលមានកីឡាហែលទឹក អត្តពលកម្ម ការ៉ាតេ តេក្វាន់ដូ កីឡាចំបាប់ ជាដើម។ កីឡាទាំងនេះសុទ្ធតែកម្ពុជាធ្លាប់មានអត្តពលិកចូលរួមប្រកួតនៅអូឡាំពិក។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា សង្កត់ធ្ងន់ថា ការស្វែងរកការឧបត្ថម្ភគាំទ្រនេះគឺទាំងពីក្រុមហ៊ុននៅកម្ពុជា និងសហរដ្ឋអាមេរិក ដើម្បីផ្ដោតលើការហ្វឹកហាត់កម្រិតខ្ពស់របស់អត្តពលិកពីប្រភេទកីឡាមានសក្ដានុពល។ ក្នុងនោះអត្តពលិកមានសមត្ថភាពល្អនឹងអាចទទួលបានឱកាសទៅហ្វឹកហាត់នៅក្រៅប្រទេសនៅទីតាំងដែលមានសក្ដានុពលត្រៀមអូឡាំពិក ក៏ដូចជាចូលរួមការប្រកួត។
ជាក់ស្ដែង ប្រទេសដែលមានខ្លាំងលើប្រភេទកីឡាអ្វី អត្តពលិកមានសក្ដានុពលរបស់កម្ពុជាក្នុងប្រភេទកីឡានោះ នឹងបានទៅហ្វឹកហាត់ឱ្យចំកន្លែងតែម្ដង។ ការប្រកួតបានច្រើនក៏ជាការវាស់ស្ទង់សំខាន់ពីសមត្ថភាពពិតប្រាកដត្រៀមអូឡាំពិកឆ្នាំ២០២៨។ គោលដៅសំខាន់របស់គណៈកម្មាធិការជាតិអូឡាំពិកកម្ពុជាដែរនោះ គឺការចូលរួមប្រកួតតាមរយៈជោគជ័យក្នុងវគ្គជម្រុះ (Qualify) ឱ្យបានច្រើន មិនមែនចូលរួមតាមសិទ្ធិអនុគ្រោះ (WildCard) នោះទេ។ ការជម្រុះដោយជោគជ័យក៏ជាកត្តាសំខាន់ដើម្បីលើកកម្ពស់សមត្ថភាពកីឡាកម្ពុជា។
ឯកឧត្ដម វ៉ាត់ ចំរើន សង្កត់ធ្ងន់ថា កិច្ចសហប្រតិបត្តិការនេះបង្ហាញពីការយកចិត្តទុកដាក់ពីចលនាអូឡាំពិក និងដៃគូពាក់ព័ន្ធទាំងអស់ដែលជាក្ដីសង្ឃឹម និងទំនុកចិត្តសម្រាប់អត្តពលិកកម្ពុជា៕
