ភ្នំពេញ៖ លោក ខេ ស៊ីបាណេត អនុប្រធានសហព័ន្ធកីឡាចំបាប់កម្ពុជា បានបង្ហើបពីគោលដៅរបស់សហព័ន្ធកីឡាចំបាប់កម្ពុជាថា ក្នុងព្រឹត្តិការណ៍ប្រកួតកីឡាអូឡាំពិក ឆ្នាំ២០៣៦ ដែលអាចនឹងរៀបចំនៅប្រទេសឥណ្ឌានោះ ផ្នែកកីឡាចំបាប់ នឹងឈានទៅដណ្តើមឱ្យបានមេដាយមកជូនកម្ពុជាពីព្រឹត្តិការណ៍ប្រកួតកីឡាដ៏ធំរៀបចំរៀងរាល់៤ឆ្នាំម្តងនេះ។
ការកំណត់គោលដៅនេះ ដោយអនុប្រធានកីឡាចំបាប់ខាងលើ បាននិងកំពុងតែធ្វើការពង្រីកវិសាលភាព និងបន្ថែមសក្កានុពលទៅកាន់បណ្តាខេត្តមួយចំនួន ដោយបានចាប់ផ្តើមពីឆ្នាំ២០២៦នេះតទៅ ដោយបង្កើតជាសាលហ្វឹកហាត់និងប្រកួតជាលក្ខណៈស្តង់ដារធំៗ នៅក្នុងខេត្តពោធិ៍សាត់ កំពង់ឆ្នាំ ខេត្តកណ្តាល និងរាជធានីភ្នំពេញ។ សាលហ្វឹកហាត់និងប្រកួតទាំងនោះ សហព័ន្ធនិងត្រូវបញ្ជូនគ្រូបង្វឹកទៅបង្ហាត់បណ្តុះបណ្តាលដល់យុវជនថ្នាលដែលមានឧបនិស្ស័យចាប់ពីអាយុ១០ដល់១២ឆ្នាំ ដើម្បីឆ្លើយតបនិងការហ្វឹកហាត់និងប្រកួតប្រជែងដោយមានគុណភាព។
ដោយឡែកងាកមកកាន់ចក្ខុវិស័យរបស់ប្រទេសកម្ពុជាវិញ ចាប់ពីឆ្នាំ២០២៦ទៅគឺបាននិងកំពុងតែបង្កើតកិច្ចសហការជាមួយសភាពាណិជ្ជកម្មអាមេរិកប្រចាំកម្ពុជាស្វែងរកការឧបត្ថម្ភគាំទ្រពីបណ្តាក្រុមហ៊ុនរបស់អាមេរិកដែលកំពុងវិនិយោគនៅកម្ពុជាដើម្បីផ្តល់នូវការឧបត្ថម្ភគាំទ្រដល់អត្តពលិកកម្ពុជាលើប្រភេទកីឡាសក្កានុពលលើ ការហ្វឹកហាត់ អាហាររូបត្ថម្ភ សំលៀកបំពាក់ និងសម្ភារកីឡាក្នុងដំណើរសម្រួចអភិវឌ្ឍសមត្ថភាពអត្តពលិកកម្ពុជាត្រៀមខ្លួនចូលរួមប្រជែងក្នុងព្រឹត្តិការណ៍កីឡាអូឡាំពិកឆ្នាំ២០២៨ នៅសហរដ្ឋអាមេរិក៕
