នៅរសៀលថ្ងៃអង្គារ ទី៣០ ខែធ្នូ ឆ្នាំ ២០២៥ ក្រុមការងារ គណៈកម្មាធិការជាតិអូឡាំពិកកម្ពុជា បានធ្វើដំណើរទៅដល់. អនុវិទ្យាល័យសម្ដេចឪ នៅ ខេត្តព្រះសីហនុ ដើម្បីរៀបចំកម្មវិធីអប់រំគុណតម្លៃអូឡាំពិក និងសមភាពស្ត្រីក្នុងវិស័យកីឡា ដោយមានការចូលរួមពីសិស្សានុសិស្សជានារីជិត២០០នាក់ពីថ្នាក់ទី៧ដល់ថ្នាក់ទៅ៩ ។
ឯកឧត្តម ប៊ុយ សុភ័ណ្ឌ ទីប្រឹក្សា នៃ គណៈកម្មាធិការជាតិអូឡាំពិកកម្ពុជា និងជាគ្រូឧទ្ទេសប្រចាំកម្មវិធីនេះ មានប្រសាសន៍ថា វគ្គទី១នៃកម្មវិធីនេះ មានការចែករំលែកពី គុណតម្លៃអូឡាំពិក ចលនាអូឡាំពិក និងប្រវត្តិកីឡាអូឡាំពិក។ បន្ទាប់មក យុវតីទាំងអស់ក៏បានចូលរួមហ្វឹកហាត់កីឡាវាយសី នៅក្លិបកីឡាវាយសី SBC ក្នុងវិទ្យាល័យសម្ដេចឪ ដើម្បីជាការផ្សព្វផ្សាយយុទ្ធនាការយុវតីម្នាក់លេងកីឡាមួយប្រភេទប្រចាំជីវិត។
ឯកឧត្ដម ប៊ុយ សុភ័ណ្ឌ សង្ឃឹមថា ក្រោយវគ្គនេះ យុវតីជាសិស្សានុសិស្សនៅ វិទ្យាល័យសម្ដេចឪ នឹងបានចូលរួមលេងកីឡាកាន់តែច្រើន ជាពិសេស កីឡាវាយសី ព្រោះស័ក្ដិសមនឹងនារី ដែលមិនបង្កជាបញ្ហាដល់រាងកាយ ដូចកីឡាមួយចំនួនទៀតឡើយ។ ជាមួយគ្នានេះ យុវតីទាំងអស់បានចូលរួមលេងកីឡាយ៉ាងផុសផុល ដែលជាសកម្មភាពល្អសម្រាប់សុខភាព។
ឯកឧត្ដម ប៊ុយ សុភ័ណ្ឌ បានបញ្ជាក់ដែរថា កម្មវិធីសមភាពស្ត្រីក្នុងវិស័យកីឡា ស្ថិតក្រោមគម្រោង នៃ ក្រុមប្រឹក្សាអូឡាំពិកអាស៊ី ដើម្បីលើកកម្ពស់ស្រ្តី ឱ្យបានដឹងពីការអប់រំគុណតម្លៃអូឡាំពិក ជំរុញស្ត្រីចូលរួមលេងកីឡា និងសមភាពយេនឌ័រក្នុងវិស័យកីឡាដែលស្ត្រីមានសិទ្ធិចូលរួមលេងកីឡាដូចបុរសដែរ ខុសពីអូឡាំពិកសម័យបុរាណដែលស្ត្រីមិនអាចលេងកីឡាបាន។
ចំណែកអ្នកគ្រូ ហាង សុខឡា គ្រូអប់រំកាយ និងកីឡានៅ វីទ្យាល័យសម្ដេចឪ បានអោយដឹងថា សិស្សានុសិស្ស របស់អ្នកគ្រូ ទាំងអស់ សុទ្ធតែបានបង្ហាញភាពរីករាយក្នុងការចូលរួមត្រងត្រាប់ស្ដាប់ការចែករំលែកពីប្រវត្តិចលនាកីឡាអូឡាំពិក និងបានចូលរួមលេងកីឡា ដែលឱ្យយុវតីទាំងអស់បានយល់ដឹងពីគុណតម្លៃនៃកីឡា និងសុខភាព។
សូមបញ្ជាក់ថា កម្មវិធីអប់រំគុណតម្លៃអូឡាំពិក និងសមភាពស្ត្រីក្នុងវិស័យកីឡា នេះត្រូវបានអនុវត្តតាំងពីឆ្នាំ ២០២១ ដែលបានរួមចំណែកបំផុសសកម្មភាពកីឡា ដល់មហាជន និងយុវជន ជាពិសេស ស្ត្រី ដែលធ្វើឱ្យមានការយល់ដឹងកាន់តែខ្លាំងពីសារៈសំខាន់នៃ ការលេង កីឡាចំពោះសុខភាព៕
