កីឡាការិនី មុត សុម៉ាវត្តី មកពីក្លឹបកីឡាប្រដាល់ នាគរាជមានជ័យ ទទួលបានមេដាយប្រាក់ប៉ុណ្ណោះ ពីការប្រកួតកីឡាប្រដាល់សកលជ្រើសរើសជើងឯកថ្នាក់ជាតិ ឆ្នាំ២០២៥ បន្ទាប់ពីនាងប្រកួតចាញ់ កីឡាការិនី រៀមច្បង វី ស្រីស្រស់ ក្នុងវគ្គផ្តាច់ព្រ័ត្រ ដោយការបោះបង់ការប្រកួតចោលត្រឹមទឹកទី២ ។
តែទោះបីជានាង ទទួលបានត្រឹមតែមេដាយប្រាក់ក៏ដោយ ហើយមិនអាចឈានទៅសម្រេចបំណងឈ្នះមេដាយមាស ជូនក្លឹប ពីការប្រកួតប្រដាល់សកលជ្រើសជើងឯកថ្នាក់ជាតិ នូវឡើយក្តី។ ប៉ុន្តែកីឡាការិនី វ័យ ១៨ ឆ្នាំរូបនេះ នៅតែចញ្ចឹមចិត្តមិនបោះបង់ ហើយនូវការបន្តខិតខំហ្វឹកហាត់ពង្រឹងសមត្ថភាព ត្រៀមដណ្តើមមេដាយមាស ឱ្យបាននៅឆ្នាំក្រោយ។
កីឡាការិនី មកពី ខេត្តតាកែវ រូបនេះបានបញ្ជាក់ទៀតថា បរាជ័យនៅលើសង្វៀនប្រដាល់សកល នាពេលនេះ មិនបានបញ្ឈប់ការតាំងចិត្តរបស់នាង ដើរលើវថីប្រដាល់សកលនោះទេ ពោលបរាជ័យ គឺជាបទពិសោធ ដែលកាន់តែលើកទឹកចិត្តឱ្យនាងខិតខំតស៊ូ ហ្វឹកហាត់បន្ថែមទៀត ដើម្បីទៅសម្រេចបានក្តីស្រម៉ៃឈ្នះមេដាយមាស ជូនក្លឹប និងគ្រួសារ ដើម្បីទទួលបានឱកាសឈានជើងឡើងដល់ការប្រកួតអន្តរជាតិនៅក្រៅប្រទេស នាពេលអនាគតខាងមុខផងដែរ។
គួរឱ្យដឹងដែរថា កីឡាការិនី មុត សុម៉ាវត្តី ជាកីឡាការិនីប្រដាល់សកល មកពីក្លឹប នាគរាជមានជ័យ នាងជាកូនស្រីទោលក្នុងគ្រួសារ មានស្រុកកំណើត ស្ថិតនៅ ក្នុងស្រុកត្រាំកក់ ខេត្ត តាកែវ មានអាយុ១៨ឆ្នាំ ជានិស្សិតឆ្នាំទី១ ។ មុនពេល សុម៉ាវត្តី ឈានជើងចូលប្រឡុកក្នុងវិស័យ កីឡាប្រដាល់សកល នាងបានចូលប្រឡូកក្នុង កីឡាល្បុក្កតោ បន្ទាប់មកក៏ វិវឌ្ឍទៅហាត់ប្រដាល់គុនខ្មែរ ហើយក៏ធ្លាប់ឡើងប្រកួត ជើងឯកថ្នាក់ជាតិទាំងល្បុក្តោ និងគុនខ្មែរ ប៉ុន្តែនាងធ្លាប់ឈ្នះបានត្រឹមតែមេដាយប្រាក់ និង សំរឹទ្ធ ប៉ុណ្ណោះ៕
