ភ្នំពេញ៖ ឯកឧត្តម វ៉ាត់ ចំរើន បានគូសបញ្ជាក់ថា ក្នុងនាម ឯកឧត្តមបណ្ឌិត ទេសរដ្ឋមន្ត្រី ថោង ខុន ប្រធាន NOCC បានទទួលអំណោយជនភៀសសឹកពី មូលនិធិជនភៀសខ្លួនអូឡាំពិក (Olympic Refugees Foundations) ដែលជាគម្រោងពិសេសមួយរបស់ គណៈកម្មាធិការអូឡាំពិកអន្តរជាតិ (IOC) ដោយស្ថាប័នអន្តរជាតិទាំងពីរនេះ បានពិនិត្យលើហេតុផលច្បាស់លាស់ណាស់ ដោយមិនមែនចេះតែផ្តល់ជូននោះទេ មុននឹងសម្រេចចិត្តផ្តល់ជូនអំណោយសប្បុរសធម៌មកដល់កម្ពុជា។
នេះជាការគូសបញ្ជាក់ពី ឯកឧត្តម អគ្គលេខាធិការនៃ គណៈកម្មាធិការជាតិអូឡាំពិកកម្ពុជា ក្នុងឱកាសទទួលអំណាយពី IOC និងOCA សម្រាប់ជនភៀសសឹក កាលពីល្ងាចថ្ងៃទី ២៥ ខែ ធ្នូ ឆ្នាំ២០២៥ នៅទីស្នាក់ការ NOCC។
ឯកឧត្តមអគ្គលេខាធិការ បានបន្ថែមទៀតថា ការផ្តល់ជូននូវអំណោយជនភៀសសឹករបស់ IOC និង OCA នេះត្រូវបានធ្វើឡើងក្នុងស្មារតីស្របតាមគោលការណ៍ ដោយបានចុះ MOU ជាមួយ អង្គការសហប្រជាជាតិ ទទួលបន្ទុកជនភៀសសឹក (UNHCR) សម្រាប់ប្រទេសណាដែលមានសង្គ្រាម ឬគ្រោះមហន្តរាយធំៗផ្សេងៗទៀត ទើបគេផ្តល់អំណោយសប្បុរសធម៌បែបនេះ ក្នុងគោលបំណងរួមចំណែកជាមួយ អង្គការសហប្រជាជាតិ ដើម្បីសម្រាលបន្ទុក ទុក្ខលំបាក និងបន្តលើកទឹកចិត្តឱ្យជនភៀសសឹក យុវជន និងកុមារមានសិទ្ធិរស់រៀនមានជីវិត មានឱកាសសិក្សារៀនសូត្រ ព្រមទាំងមានឱកាសលេងកីឡាផងដែរ។
អំណោយដែលទទួលបានផ្ទាល់ពី ចលនាអូឡាំពិកអន្តរជាតិ និង ចលនាអាស៊ី សម្រាប់ជនភៀសសឹកកម្ពុជា នាពេលនេះ មានដូចជាអង្ករ សៀវភៅ សម្ភារសិក្សាជាច្រើនទៀត សម្ភារកីឡា រួមទាំងកញ្ចប់ពេទ្យ ជាច្រើនតោនផងដែរ។
ឯកឧត្តម វ៉ាត់ ចំរើន បានពន្យល់ថា ៖«បើទោះបីជាជនភៀសសឹកបានផ្លាស់ទីលំនៅចេញពីផ្ទះសម្បែងក៏ដោយ ក៏ពួកគាត់មានសិទ្ធិលេងកីឡា ដោយគេមិនអាចបិទសិទ្ធិលេងកីឡារបស់ពួកគាត់បានទេ ពីព្រោះថា នៅក្នុងចំណោមជនភៀសសឹកក៏មានកីឡាករ នៅក្នុងនោះដែរ។
ដូច្នេះ យើងមើលឃើញថា ជាស្មារតី ដែលយើងទទួលបាននូវអំណោយពី IOC និង OCA នាពេលនេះ គឺដើម្បីផ្តល់ដល់ ជនភៀសសឹកកម្ពុជា ដោយសារគេមើលឃើញថា សង្គ្រាមដែលកើតឡើងពីការរំលោភបំពាននេះ គឺចលនាអូឡាំពិកពិភពលោកបានទទួលស្គាល់ថា កម្ពុជាជាជនរងគ្រោះ។
នេះជាចំណុចសំខាន់ ដែលជាជំនួយស្មារតីមួយ ក្នុងការផ្តល់ជូន យុត្តិធម៌សម្រាប់ជនភៀសសឹកកម្ពុជាយើង ហើយយើងពិតជាជនរងគ្រោះដោយសារសង្គ្រាមឈ្លានពានពិតប្រាកដមែន»។
«ដូច្នេះក្នុងនាមចលនាអូឡាំពិកកម្ពុជា និងសហព័ន្ធកីឡាជាតិ នៅតែឈរលើស្មារតីមនុស្សធម៌ និងអំពាវនាវ ឱ្យមានការបញ្ឈប់សង្គ្រាមឈ្លានពាន ដែលធ្វើឱ្យមានជនភៀសសឹកកើនឡើង និងជាសោកនាដកម្មដ៏សែនអាក្រក់មួយ។
សម្រាប់គម្រោងចែកអំណោយទាំងនេះ នឹងចែកជាពីរផ្នែក ក្នុងនោះនឹងចែកជូនដល់ជនភៀសសឹក នៅខេត្តឧត្តរមានជ័យ និងមួយចំណែកធំទៀត រួមទាំងថវិកា ៨ លានរៀលទៀត នឹងបរិច្ចាកតាមរយៈ ក្រសួងអប់រំ យុវជន និងកីឡា ដែលជាស្ថាប័នតំណាងឱ្យ រាជរដ្ឋាភិបាល នឹងចែកជូនជនភៀសសឹកដែលជា គ្រូបង្រៀន និងសិស្សានុសិស្ស សម្រាប់សកម្មភាពអប់រំភ្ជាប់ជាមួយនឹងកីឡាផងដែរ»៕
