កាលពីថ្ងៃចន្ទ ទី១ ខែធ្នូ ឯកឧត្ដម ញ៉ាន សុខវិសាល នាយបេសកកម្មកម្ពុជា ចូលរួមព្រឹត្តិការណ៍កីឡាអាស៊ីអាគ្នេយ៍ ឆ្នាំ ២០២៥ បានធ្វើដំណើរទៅកាន់ ទីក្រុងបាងកក ប្រទេសថៃ ដើម្បីចូលរួមកិច្ចប្រជុំពាក់ព័ន្ធ នឹងការរាយការណ៍ចុងក្រោយស្ដីពីចំនួន ប្រតិភូ អត្តពលិក និងប្រភេទកីឡាចូលរួម ក្នុងព្រឹត្តិការណ៍ស៊ីហ្គេម ពីចន្លោះពីថ្ងៃទី ០៩ ដល់ថ្ងៃទី ២១ ខែ ធ្នូ ខាងមុខ។
ជុំវិញការស្នាក់នៅ ហូបចុក ឯកឧត្ដម ញ៉ាន សុខវិសាល បានមានប្រសាសន៍ថា ក្រុមកម្ពុជាមានលក្ខណៈពិសេសជាងក្រុមកីឡាប្រទេសផ្សេង ដោយប្រតិភូ និងអត្តពលិកកម្ពុជាស្នាក់នៅរួមគ្នាតែម្ដង ដោយមិនបែងចែកប្រភេទកីឡាឡើយ ហើយការស្នាក់នៅ និងប្រកួតមាននៅ ២កន្លែង គឺ នៅក្រុងបាងកក និង ខេត្តឈុនបុរី។
ក្រៅពីនេះ ឯកឧត្ដមនាយបេសកកម្ម បានប្រាប់ថា ក៏មានការជជែកពីការរក្សា សន្តិសុខ សុវត្ថិភាពដល់ ក្រុមប្រតិភូ និងអត្តពលិកកម្ពុជា ក្នុងអំឡុងការចូលរួមការប្រកួតកីឡាស៊ីហ្គេម ដោយមានការចូលរួមការពារយ៉ាងពេញទំហឹង ពីសមត្ថកិច្ចម្ចាស់ផ្ទះ ទាំងនៅសណ្ឋាគារ និងពេលធ្វើដំណើរ។
ឯកឧត្ដម ញ៉ាន សុខវិសាល បានឱ្យដឹងទៀតដែរថា ឯកឧត្ដម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា នឹងមានកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ នៅថ្ងៃទី ៨ ខែធ្នូ ។
ទាក់ទងទៅនឹងចំនួនចុងក្រោយរបស់់ កីឡាកម្ពុជា ដែលចូលរួម ស៊ីហ្គេម ២០២៥ មានអត្តពលកម្ម ហែលទឹក ជិះសេះ គុនដាវ កាយសម្ព័ន្ធ តេក្វាន់ដូ WT ឃីកបុកស៊ីង ម៉ូតូទឹក ជឺជីតស៊ូ បាល់ទាត់លើតុ ទ្រីយ៉ាត្លុង និងកីឡាអេឡិចត្រូនិក ខណៈប្រតិភូ និងអត្តពលិកមានចំនួន ១៣៧នាក់៕
