អត្តពលិកវាយកូនបាល់មកពី ២១ប្រទេស បានចូលរួមប្រកួតប្រជែងយក ពានរង្វាន់វាយកូនបាល់ ទេពឃុនណា (30th Annual Tep Kunnah Memorial Cup 2025) លើកទី៣០ នៅពហុកីឡដ្ឋានជាតិមរតកតេជោ រាជធានីភ្នំពេញ ដើម្បីរម្លឹកខួបអតីតកីឡាករជើងខ្លាំងរបស់កម្ពុជា លោក ទេព ឃុនណា។
កញ្ញា ស៊ុម ចិន្តា អ្នកសម្របសម្រួល ការប្រកួតកីឡាវាយកូនបាល់ ពានរង្វាន់ទេព ឃុនណា បានគូសបញ្ជាក់ថា ព្រឹត្តិការណ៍នេះដំណើរការប្រកួតចំនួន ២ សប្តាហ៍ ដោយសប្តាហ៍ទី១ ចាប់ផ្តើមពីថ្ងៃទី ១០-១៥ ខែវិច្ឆិកា និងសប្តាហ៍ទី២ ចាប់ផ្តើមពីថ្ងៃទី ១៦-២១ ខែវិច្ឆិកា ឆ្នាំ២០២៥។ កញ្ញាបន្ថែមថា ការប្រកួតនេះមាន កីឡាករ កីឡារិនី កម្រិតបច្ចេកទេសខ្ពស់ៗ ដោយផ្តោតសំខាន់លើ អត្តពលិកវ័យក្មេង ខណៈម្ចាស់ផ្ទះកម្ពុជា មានសមាសភាពកីឡាករ ៣នាក់បានចូលរួមប្រកួតប្រជែងជាមួយ កីឡាករអន្តរជាតិ ដើម្បីដកបទពិសោធ និងបង្កើនគុណភាពបច្ចេកទេសឱ្យកាន់តែល្អប្រសើរបន្ថែមទៀត។
ជាមួយគ្នានេះ កញ្ញា ស៊ុម ចិន្តា បានសង្កត់ធ្ងន់ថា សម្រាប់ការទទួលរៀបចំធ្វើម្ចាស់ផ្ទះ ឆ្នាំ២០២៥នេះ សហព័ន្ធបានត្រៀមខ្លួនជាច្រើនខែមកហើយ ដើម្បីរៀបចំឱ្យបានគ្រប់ជ្រុងជ្រោយលើការហូបចុក ស្នាក់នៅ ដឹកជញ្ជូនជាដើម ដើម្បីទទួល ប្រតិភូ គ្រូបង្វឹក កីឡាករ កីឡាការិនីមកពីប្រទេសចំនួន ២០ ផ្សេងទៀតឱ្យទទួលបានភាពកក់ក្តៅ និងកិត្តិយសជាតិ ក្នុងនាមជាម្ចាស់ផ្ទះផងដែរ។
អ្នកសម្របសម្រួលព្រឹត្តិការណ៍រូបនេះឱ្យដឹងទៀតថា កីឡាករ កីឡាការិនី វាយកូនបាល់ មកពី ២១ ប្រទេស មានដូចជា ប្រទេសម៉ាឡេស៊ី សិង្ហបុរី ចិន កូរ៉េខាងត្បូង ឥណ្ឌូណេស៊ី ឥណ្ឌា វៀតណាម ជប៉ុន អង់គ្លេស ន័រវែស ព្រុយណេ រុស្ស៊ី ស្រីលង្កា អូស្ត្រាលី នូវែលសេឡង់ អូទ្រីស បង់ក្លាដែស និងបារាំងជាដើម។
ជាមួយគ្នានេះ លោក ជា ពៅ អគ្គលេខាធិការរង សហព័ន្ធកីឡាវាយកូនបាល់កម្ពុជា បានឱ្យដឹងដែរថា ការប្រកួតនេះធ្វើឡើង ដើម្បីរម្លឹកគុណដល់ លោក ទេព ឃុនណា អតីតកីឡាករវាយកូនបាល់កម្ពុជា មួយរូបក្នុងអំឡុងឆ្នាំ១៩៦០ និងជាឪពុកបង្កើតរបស់លោក ទេព រិទ្ធីវិទ្ធ អគ្គលេខាធិការ សហព័ន្ធកីឡាវាយកូនបាល់កម្ពុជា។ លោក ទេព ឃុនណា គឺជាអតីតកីឡាករវាយកូនបាល់ឆ្នើមរបស់ កម្ពុជា ដែលបានទទួលមរណៈភាពជាង២០ឆ្នាំកន្លងទៅ៕
