នៅព្រឹកថ្ងៃចន្ទ ទី១៣ ខែតុលា ឆ្នាំ២០២៥ ក្នុងឱកាសសំណេះសំណាលជាមួយអត្តពលិកវ័យក្មេងកម្ពុជាដែលត្រូវចេញទៅប្រកួតព្រឹត្តិការណ៍កីឡាយុវជនអាស៊ី ឆ្នាំ២០២៥ នៅក្រុងម៉ាណាម៉ា ប្រទេសបារ៉ែន ថ្ងៃទី២២ ដល់ថ្ងៃទី៣១ ខែតុលា ខាងមុខ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានផ្ដាំផ្ញើកីឡាករកីឡាការិនីគ្រប់រូបត្រូវប្រកាន់ខ្ជាប់នូវវិន័យ សេចក្ដីថ្លៃថ្នូរ និងការគោរពគ្នាទៅវិញទៅមកជាមួយអត្តពលិកប្រទេសដទៃទៀត។
“ក្នុងនាមជាម្ចាស់ផ្ទះឆ្នាំ២០២៩ផង យើងត្រូវតែយកឱកាសនេះដើម្បីបង្ហាញពីវិន័យ សីលធម៌ ការគោរពច្បាប់ទម្លាប់ កុំឌឺដងគ្នាជាមួយអត្តពលិកដែលមានទំនាក់ទំនងមិនសូវល្អជាមួយយើង ដើម្បីបង្ហាញភាពចាស់ទុំ និងធានាឱ្យបាននូវកិត្យានុភាពរបស់កម្ពុជាលើឆាកអន្តរជាតិ។” នេះជាការបញ្ជាក់របស់ឯកឧត្ដមឧបនាយករដ្ឋមន្ត្រី។
ឯកឧត្ដមប្រមុខក្រសួងអប់រំ យុវជន និងកីឡា ក៏បានក្រើនរំឭកដល់អត្តពលិកត្រូវប្រឹងប្រែងហ្វឹកហាត់ និងប្រកួតអស់ពីសមត្ថភាព ព្រោះកម្រិតយុវជនអាស៊ីក៏មានការប្រកួតប្រជែងខ្លាំង និងច្រើនប្រទេសជាងកម្រិតតំបន់អាស៊ីអាគ្នេយ៍។ ទន្ទឹមនឹងនេះ កីឡាករ កីឡាការិនីត្រូវចៀសឱ្យបាននូវការប្រើប្រាស់សារធាតុប៉ូវកម្លាំងដើម្បីរក្សាភាពស្អាតស្អំក្នុងកីឡា។
ឯកឧត្ដមបណ្ឌិតសភាចារ្យ ហង់ជួន ណារ៉ុន ថ្លែងអំណរគុណដល់ក្រសួងវប្បធម៌ និងវិចិត្រសិល្បៈ ដែលបានសហការចូលរួមក្នុងពិធីទទួលទង់ព្រឹត្តិការណ៍កីឡាយុវជនអាស៊ី និងការសម្ដែងនូវផ្ទាំងទស្សនីយភាពនានាដែលបង្ហាញនូវវប្បធម៌ ប្រពៃណីដ៏ផូរផងរបស់កម្ពុជា។
ការចូលរួមលើកនេះត្រូវបានឯកឧត្ដមឧបនាយករដ្ឋមន្ត្រីសង្កត់ដែរថា មិនត្រឹមសម្រាប់ការប្រកួតប៉ុណ្ណោះទេ តែក៏ជាការរៀនសូត្រពីការរៀបចំដើម្បីកម្ពុជាធ្វើជាម្ចាស់ផ្ទះសម្រាប់ឆ្នាំ២០២៩ ហើយសហព័ន្ធនីមួយត្រូវតែពង្រឹងសមត្ថភាពទាំងគ្រូបង្វឹក និងកីឡាករ កីឡាការិនីផងដែរ។
ក្នុងការចូលរួមព្រឹត្តិការណ៍កីឡាយុវជនអាស៊ី ឆ្នាំ២០២៥ នៅបារ៉ែន កម្ពុជាបានបញ្ជូនប្រតិភូ កីឡាករ កីឡាការិនី និងក្រុមសិល្បករ សិល្បការិនី សម្ដែងក្នុងពិធីបិទ សរុប១៥៧នាក់ និងប្រកួតប្រែងលើ១៤ប្រភេទកីឡា៕
