Nagoya, ប្រទេសជប៉ុន៖ នារាត្រីថ្ងៃព្រហស្បតិ៍ ទី១៧ ខែកញ្ញា ឆ្នាំ២០២៦ ក្រុមប្រតិភូ និងអត្តពលិកជម្រើសជាតិកម្ពុជា បានចូលរួមក្នុងពិធីទទួលស្វាគមន៍ និងគោរពទង់ជាតិរបស់បណ្តាប្រទេសនានា ដែលចូលរួមក្នុងព្រឹត្តិការណ៍ កីឡាអាស៊ី លើកទី២០ ឆ្នាំ២០២៦ (20th Asian Games Aichi-Nagoya 2026) នៅទីក្រុង Nagoya ប្រទេសជប៉ុន។
ពិធីនេះត្រូវបានដឹកនាំដោយ ឯកឧត្តម វ៉ាត់ ចំរើន នាយកបេសកកម្មកម្ពុជា ដោយមានការចូលរួមពីសមាជិកប្រតិភូ គ្រូបង្វឹក និងអត្តពលិកកម្ពុជា។ ក្នុងឱកាសនេះ ក្រុមប្រតិភូ និងអត្តពលិកមកពីបណ្តាប្រទេសនានា ត្រូវបានភាគីម្ចាស់ផ្ទះជប៉ុនទទួលស្វាគមន៍ និងផ្តល់បដិសណ្ឋារកិច្ចយ៉ាងកក់ក្តៅ ក្នុងបរិយាកាសប្រកបដោយមិត្តភាព និងសាមគ្គីភាពនៃកីឡា។
ពិធីនេះក៏ជាឱកាសដ៏សំខាន់មួយសម្រាប់ប្រតិភូ និងអត្តពលិកពីបណ្តាប្រទេសនានា បានជួបសំណេះសំណាល និងផ្លាស់ប្តូរបទពិសោធន៍គ្នា មុនពេលព្រឹត្តិការណ៍កីឡាអាស៊ី លើកទី២០ ឈានចូលដល់ពិធីបើកជាផ្លូវការ ដែលនឹងប្រព្រឹត្តទៅនៅថ្ងៃសៅរ៍ ទី១៩ ខែកញ្ញា ឆ្នាំ២០២៦។
ជាមួយគ្នានេះ បន្ទាប់ពីពិធីទទួលស្វាគមន៍ និងគោរពទង់ជាតិរួចមក ភាគីម្ចាស់ផ្ទះជប៉ុន ក៏បានអញ្ជើញថ្នាក់ដឹកនាំ និងប្រតិភូកីឡាពីបណ្តាប្រទេសចូលរួម ឱ្យចូលរួមក្នុងសកម្មភាព ដាំដើមឈើ ដែលជានិមិត្តសញ្ញានៃការរួមគ្នា មិត្តភាព សាមគ្គីភាព និងការចូលរួមចំណែកក្នុងការលើកកម្ពស់បរិស្ថាន និងការអភិវឌ្ឍប្រកបដោយចីរភាព តាមរយៈព្រឹត្តិការណ៍កីឡាអន្តរជាតិ។
សូមជម្រាបថា សម្រាប់ការចូលរួមក្នុងព្រឹត្តិការណ៍ កីឡាអាស៊ី លើកទី២០ ឆ្នាំ២០២៦ នៅ Aichi-Nagoya ប្រទេសជប៉ុន កម្ពុជាបានបញ្ជូនប្រតិភូ និងអត្តពលិកសរុប ១០៦នាក់ ចូលរួមប្រកួតប្រជែងលើ ១៤ប្រភេទកីឡា។
ក្នុងចំណោមប្រភេទកីឡាទាំង១៤ របស់កម្ពុជា កីឡាបាល់ទាត់លើតុ គឺជាប្រភេទកីឡាដំបូងដែលនឹងចាប់ផ្តើមការប្រកួត ដោយត្រូវបើកឆាកនៅថ្ងៃសុក្រ ទី១៨ ខែកញ្ញា ឆ្នាំ២០២៦ មួយថ្ងៃមុនពិធីបើកជាផ្លូវការនៃព្រឹត្តិការណ៍។
ព្រឹត្តិការណ៍ Aichi-Nagoya 2026 នឹងប្រព្រឹត្តទៅចាប់ពីថ្ងៃទី១៩ ខែកញ្ញា ដល់ថ្ងៃទី៤ ខែតុលា ឆ្នាំ២០២៦ នៅប្រទេសជប៉ុន ដោយមានអត្តពលិក និងប្រតិភូកីឡាមកពីបណ្តាប្រទេស និងដែនដីនានាទូទាំងទ្វីបអាស៊ីចូលរួមប្រកួតប្រជែង ដើម្បីបង្ហាញពីសមត្ថភាព កីឡាករ-កីឡាការិនី និងពង្រឹងចំណងមិត្តភាពតាមរយៈវិស័យកីឡា។ 🇰🇭🇯🇵
