គណៈកម្មាធិការជាតិអូឡាំពិកកម្ពុជា (NOCC) និងក្រុមហ៊ុន ញូ-ធី-រីច បានរៀបចំពិធីចុះហត្ថលេខាលើអនុស្សរណៈនៃការយោគយល់គ្នា (MOU) សម្រាប់ការរៀបចំយុទ្ធនាការកៀរគរថវិកា «ក្រុមអត្តពលិកអូឡាំពិកកម្ពុជា» ដើម្បីត្រៀមខ្លួនចូលរួមប្រកួតកីឡាអូឡាំពិករដូវក្តៅ ឆ្នាំ២០២៨ នៅក្រុង Los Angeles (LA 2028 Olympics)។ ព្រឹត្តិការណ៍នេះបានប្រព្រឹត្តទៅនាថ្ងៃទី១៥ ខែកញ្ញា ឆ្នាំ២០២៦ នៅក្រុមហ៊ុន ញូ-ធី-រីច សាខាសែនសុខ។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានចាត់ទុក ញូ-ធី-រីច ជាក្រុមហ៊ុនគំរូមួយដែលបានឈានជើងមកចូលរួមគាំទ្រដល់ដំណើរឆ្ពោះទៅអូឡាំពិក LA 2028។
ឯកឧត្ដមអគ្គលេខាធិការសង្កត់ធ្ងន់ថា “៖ ការលះបង់នេះមិនមែនដើម្បីលាភសការៈឡើយ តែដើម្បីមោទនភាពជាតិ។ អត្តពលិកកម្ពុជាហ៊ានប្តូរញើសឈាមហ្វឹកហាត់ គឺដើម្បីកិត្តិយសប្រទេសជាតិសុទ្ធសាធ។ យើងមានសុបិនរួមគ្នាមួយ គឺការបំបែកកំណត់ត្រាដណ្តើមមេដាយអូឡាំពិកដំបូងជូនកម្ពុជា។ ក្នុងកីឡាលំដាប់ពិភពលោកមួយនេះ យើងមិនដែលឈ្នះមេដាយសោះឡើយ ហើយភាពកម្រនេះហើយ ដែលធ្វើឱ្យមេដាយមួយនេះមានតម្លៃជាប្រវត្តិសាស្ត្រ។
ក្នុងនាមក្រសួងអប់រំយុវជន និងកីឡា ក៏ដូចជាគណៈកម្មាធិការជាតិអូឡាំពិកកម្ពុជា ឯកឧត្ដម វ៉ាត់ ចំរើន បានវាយតម្លៃខ្ពស់ចំពោះការឧបត្ថម្ភគាំទ្រពីវិស័យឯកជន។ កិច្ចសហការ និងឆន្ទៈដ៏បរិសុទ្ធរបស់បណ្តាក្រុមហ៊ុនទាំងអស់ គឺជាគំរូដ៏ឆ្នើមក្នុងការជ្រោមជ្រែងកីឡាករ-កីឡាការិនីកម្ពុជា ឱ្យមានកម្លាំងចិត្តបោះជំហានបង្កើតប្រវត្តិសាស្ត្រថ្មីដ៏អស្ចារ្យនាថ្ងៃអនាគត។
ជាមួយគ្នានេះ លោក ហាន សីហា ប្រធានក្រុមប្រឹក្សាភិបាល និងអគ្គនាយក ក្រុមហ៊ុន ញូ-ធី-រីច ឯ.ក
មានប្រសាសន៍ថា "ក្នុងនាមក្រុមប្រឹក្សាភិបាល និងគ្រួសារ ញូ-ធី-រីច ខ្ញុំមានកិត្តិយស និងសេចក្តីសោមនស្សរីករាយយ៉ាងក្រៃលែង ដែលបានទទួលស្វាគមន៍ ឯកឧត្តម និងភ្ញៀវកិត្តិយសទាំងអស់ ក្នុងពិធីចុះអនុស្សរណៈយោគយល់គ្នានាថ្ងៃនេះ។
លោកប្រធានក្រុមប្រឹក្សាភិបាលដដែលបន្តថា កិច្ចព្រមព្រៀងរវាង គណៈកម្មាធិការជាតិអូឡាំពិកកម្ពុជា និង ញូ-ធី-រីច ក្រោមប្រធានបទ «រួមគ្នាគាំទ្រអត្តពលិកកម្ពុជា បង្កើតប្រវត្តិសាស្ត្រដ៏អស្ចារ្យ» គឺជាជំហានដ៏មានអត្ថន័យនៃការរួមកម្លាំងរវាងស្ថាប័នជាតិ និងវិស័យឯកជន ដើម្បីជួយជំរុញកីឡាករ-កីឡាការិនីជម្រើសជាតិ ដណ្តើមបានមេដាយអូឡាំពិកដំបូងជូនមាតុភូមិ។
ការចូលរួមក្នុងយុទ្ធនាការកៀរគរថវិកា «ក្រុមកីឡាអូឡាំពិកកម្ពុជា» ឆ្ពោះទៅ LA 2028 មិនត្រឹមតែជាកិច្ចសហប្រតិបត្តិការអាជីវកម្មប៉ុណ្ណោះទេ ប៉ុន្តែជាការបង្ហាញយ៉ាងច្បាស់ពីស្មារតីទទួលខុសត្រូវសង្គម ភាពជាដៃគូស្មោះស្ម័គ្រ និងមោទនភាពជាតិដ៏ខ្ពង់ខ្ពស់៕"
