ក្នុងវ័យ ៥៨ ឆ្នាំ លោក គីម សារឿន ដែលអ្នកនិយមកីឡារត់ហៅឈ្មោះក្រៅថា «គីមកុក» និង ជាអ្នករត់ចម្ងាយឆ្ងាយឆ្លងកាត់ឧបសគ្គដ៏លេចធ្លោរបស់កម្ពុជា ជិតបានសម្រេចក្ដីស្រមៃដ៏អស្ចារ្យមួយទៀតហើយ។ លោកត្រូវបានជ្រើសរើសជាផ្លូវការឱ្យចូលរួមប្រកួតក្នុងព្រឹត្តិការណ៍ដ៏ធំកម្រិតពិភពលោក គឺ UTMB Mont Blanc Finals 2026 ដែលជាការរត់ប្រណាំងលើផ្លូវភ្នំដ៏លំបាក និងប្រកួតប្រជែងបំផុត។
បេសកកម្មដ៏លំបាកនេះ តម្រូវឱ្យកីឡាករគ្រប់រូបរត់ឆ្លងកាត់ ៣ ប្រទេស រួមមាន បារាំង ស្វីស និងអ៊ីតាលី លើចម្ងាយផ្លូវរហូតដល់ ១៧៤ គីឡូម៉ែត្រ ជាមួយនឹងកម្ពស់ប្រមាណពី ៩,៩០០ ម៉ែត្រ។
លោក គីម សារឿន បានបង្ហាញក្តីរំភើបឥតឧបមាដែលទទួលបានឱកាសមាសតំណាងឱ្យប្រទេសជាតិលើឆាកអន្តរជាតិមួយនេះ។ លោកបានបញ្ជាក់ដោយចិត្តមុតមាំថា នឹងខិតខំប្រឹងប្រែងរត់ឱ្យដល់ទីព្រ័ត្រ ដើម្បីឆ្លើយតបទៅនឹងការគាំទ្រ និងការជួយជ្រោមជ្រែងយ៉ាងពេញទំហឹងពីសំណាក់មហាជនខ្មែរទាំងអស់។
ព្រឹត្តិការណ៍ UTMB Mont-Blanc Finals គឺជាវេទិកាកំពូលដែលប្រមូលផ្តុំទៅដោយកីឡាករឆ្នើមៗមកពីជាង ១០០ ប្រទេសជុំវិញពិភពលោក។ លោកបានទម្លាយថា មុននឹងទទួលបានសំបុត្រមាសទៅកាន់ការប្រកួតចម្ងាយ ១៧៤ គីឡូម៉ែត្រនេះ លោកត្រូវឆ្លងកាត់ការតស៊ូ និងការជម្រុះយ៉ាងតឹងតែងលើវិញ្ញាសារត់ ៥០ គីឡូម៉ែត្រ និង ១០០ គីឡូម៉ែត្រជាច្រើនដំណាក់កាល។
ផ្ដើមចេញពីការរត់លើផ្លូវរាបស្មើធម្មតាកាលពីជាង ១០ ឆ្នាំមុន លោក គីម សារឿន បានអភិវឌ្ឍសមត្ថភាពខ្លួនឯងបន្តិចម្តងៗ រហូតក្លាយជាកីឡាករលេចធ្លោមួយរូបក្នុងប្រភេទកីឡារត់ឆ្លងកាត់ឧបសគ្គ (Trail Running)។ កីឡាមួយនេះ មិនត្រឹមតែនាំរូបលោកទៅកាន់ឆាកអន្តរជាតិនោះទេ ប៉ុន្តែថែមទាំងបានផ្លាស់ប្ដូរសុខភាពរបស់លោកឱ្យរឹងមាំ និងចៀសផុតពីជំងឺដង្កាត់ផ្សេងៗយ៉ាងសកម្មផងដែរ៕
