លោក Jan Johan គឺជាអតីតកីឡាករប្រដាល់សកលជនជាតិរុស្ស៊ី និងធ្លាប់ចេញទៅប្រកួតនៅប្រទេសនានាយ៉ាងច្រើន ហើយបច្ចុប្បន្ននេះលោកកំពុងរស់នៅប្រទេសកម្ពុជា។
មួយរយៈធំចុងក្រោយនេះ បុរសវ័យ៥៤ឆ្នាំបានចូលរួមជួយបង្ហាត់កីឡាករជម្រើសជាតិប្រដាល់សកលកម្ពុជា ក្នុងនាមជាគ្រូជំនួយជម្រើសជាតិ ជាពិសេសលើការសម្រួចសមត្ថភាពកីឡាករ Anvar Nasredinov Rajapov Abullah និង វី សុភ័ស្ស ក្នុងដំណើរឆ្ពោះទៅប្រជែងមេដាយជើងឯកអាស៊ី ឆ្នាំ២០២៦ នៅប្រទេសជប៉ុន ក្នុងខែកញ្ញា ខាងមុខ ក៏ដូចជា វគ្គជម្រុះដើម្បីដណ្ដើមសិទ្ធិពេញលេញទៅកាន់ព្រឹត្តិការណ៍កីឡាអូឡាំពិក នៅក្រុង Los Angels សហរដ្ឋអាមេរិក ឆ្នាំ២០២៨។
ឆ្លងកាត់ការរួមចំណែកបង្ហាត់កន្លងមក លោក Johan បានមើលឃើញពីសក្ដានុពលរបស់កីឡាករកម្ពុជា ដែលមានសមត្ថភាព តែអ្វីជារនាំងក្នុងការអភិវឌ្ឍនោះ គឺកង្វះការប្រកួត។ លោកសង្ឃឹមថា នឹងមានកម្មវិធីប្រកួតច្រើនដើម្បីសម្រួចគុណភាពកូនក្រុមបានកាន់តែប្រសើរ។ ជាមួយគ្នានេះ គ្រូបង្វឹកដដែលក៏ចែករំលែកបន្ថែមដល់យុវជនថ្នាល ដោយចង់ឱ្យពួកគេផ្ដោតច្រើនថែមទៀតលើការហ្វឹកហាត់ផ្នែកមូលដ្ឋានគ្រឹះ។
ទន្ទឹមនឹងនេះ លោក Johan បានសរសើរពីកីឡាករ វី សុភ័ស្ស ដែលជាជម្រើសជាតិដ៏ឆ្នើមរបស់កម្ពុជាថា មានការប្ដេជ្ញាចិត្តខ្ពស់ក្នុងការហ្វឹកហាត់ និងគោរពវិន័យបានល្អ។ លោកមើលឃើញរូបគេជាកីឡាករប្រកបដោយសក្ដានុពលមួយរូបនៅកម្ពុជា។ លោកជឿជាក់ថា ទាំងសុភ័ស្ស Anvar និង Rajapov ក៏ដូចជាកូនក្រុមផ្សេងទៀតនឹងធ្វើបានល្អក្នុងព្រឹត្តិការណ៍អន្តរជាតិធំ។
លោក Jan Johan បានរស់នៅប្រទេសកម្ពុជាច្រើនឆ្នាំមកហើយ និងមានភរិយាជាជនជាតិខ្មែរ។ លោកអះអាងថា ពិតជាសប្បាយរីករាយដែលបានចូលរួមចំណែកបណ្ដុះបណ្ដាលធនធានកីឡាករ កីឡាការិនីប្រដាល់សកលកម្ពុជា៕
