ភ្នំពេញ៖ ក្រុមប្រតិភូកីឡាកម្ពុជាចំនួន ៧រូប បានវិលត្រឡប់មកដល់មាតុប្រទេសដោយសុវត្ថិភាព នៅថ្ងៃទី២៩ ខែមិថុនា ឆ្នាំ២០២៦ បន្ទាប់ពីបញ្ចប់វគ្គបណ្តុះបណ្តាលរយៈពេល ២សប្តាហ៍ ស្តីពី «ការគ្រប់គ្រងវិស័យកីឡាប្រកួតប្រជែងសម្រាប់ប្រទេសកំពុងអភិវឌ្ឍ» នៅសាធារណរដ្ឋប្រជាមានិតចិន ដែលមានសិក្ខាកាម ៣៦រូប មកពី ១០ប្រទេស។
វគ្គបណ្តុះបណ្តាលនេះ បានផ្តល់ចំណេះដឹង និងបទពិសោធលើការគ្រប់គ្រងវិស័យកីឡា ការអភិវឌ្ឍអត្តពលិក ការគ្រប់គ្រងមជ្ឈមណ្ឌលហ្វឹកហាត់ ក្រុមជម្រើសជាតិ និងសហព័ន្ធកីឡា ការអនុវត្តវិទ្យាសាស្ត្រកីឡា ព្រមទាំងការរៀបចំព្រឹត្តិការណ៍កីឡា និងការប្រើប្រាស់បច្ចេកវិទ្យាក្នុងការអភិវឌ្ឍវិស័យកីឡា។
អ្នកស្រី ហង់ ស៊ីមន អនុប្រធានមជ្ឈមណ្ឌលជាតិហ្វឹកហ្វឺនកីឡា បានមានប្រសាសន៍ថា៖ ក្រុមប្រតិភូកម្ពុជាបានធ្វើទស្សនកិច្ចសិក្សានៅមជ្ឈមណ្ឌលហ្វឹកហាត់ សាកលវិទ្យាល័យ និងស្ថាប័នកីឡាឈានមុខរបស់ចិន ព្រមទាំងផ្លាស់ប្តូរបទពិសោធ ជាមួយមន្ត្រីកីឡាមកពីបណ្តាប្រទេសផ្សេងៗ ដើម្បីពង្រឹងបណ្តាញកិច្ចសហប្រតិបត្តិការអន្តរជាតិ។
ចំណេះដឹង និងបទពិសោធ ដែលទទួលបាន នឹងរួមចំណែកលើកកម្ពស់គុណភាពនៃការគ្រប់គ្រង ការហ្វឹកហាត់ និងការអភិវឌ្ឍអត្តពលិកកម្ពុជា ឆ្ពោះទៅការបង្កើនសមត្ថភាពប្រកួតប្រជែងនៅថ្នាក់តំបន់ និងអន្តរជាតិ។
ក្នុងឱកាសនេះ អ្នកស្រីក៍បានថ្លែងអំណរគុណដល់ក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា ព្រមទាំងភាគីចិន ដែលបានផ្តល់ការគាំទ្រ និងរៀបចំវគ្គបណ្តុះបណ្តាលប្រកបដោយជោគជ័យ និងសម្តែងក្តីសង្ឃឹមថា កិច្ចសហប្រតិបត្តិការវិស័យកីឡារវាងកម្ពុជា និងចិន នឹងបន្តរីកចម្រើនបន្ថែមទៀត។
