កីឡាករប្រដាល់វ័យក្មេងជម្រើសជាតិកម្ពុជាខឿន សីហា ប្រាប់ថា ស្រលាញ់កីឡាប្រដាល់តាំងពីឆ្នាំ២០២២ ហើយដោយសារតែស្រលាញ់ពេក គេបានធ្វើបាវសាក់ចងនៅក្រោយផ្ទះ ហាត់ម្នាក់ឯងដល់យប់ជ្រៅស្ទើរតែរាល់ថ្ងៃ។
យុវជនវ័យ២០ឆ្នាំបញ្ជាក់ថា ការហ្វឹកហាត់ខ្លួនឯង ព្រោះតែនៅស្រុកកំណើតរបស់គេក្នុងខេត្តព្រៃវែង ពុំមានក្លិបប្រដាល់ឡើយ។ ដល់ចប់បាក់ឌុប ឆ្នាំ២០២៤ គេបានសុំម្ដាយមកហ្វឹកហាត់នៅភ្នំពេញតែម្ដង ហើយដោយសារតែឃើញកូនប្រុសស្រលាញ់ខ្លាំង ម្ដាយរបស់គេក៏មិនបានឃាត់ឃាំងអ្វីដែរ។
ខឿន សីហា ថ្លែងដែរថា នៅពេលឃើញរៀមច្បងជាច្រើនទទួលបានជោគជ័យ គឺកាន់តែជំរុញចិត្តរបស់គេយ៉ាងខ្លាំងក្នុងការហ្វឹកហាត់ដើម្បីទទួលបានផ្លែផ្កាដូចគ្នា។
បច្ចុប្បន្ន ខឿន សីហា ហ្វឹកហាត់គុនខ្មែរនៅក្លិបនាគរាជចតុមុខ និងកំពុងប្រមូលផ្ដុំហ្វឹកហាត់ក្នុងក្រុមជម្រើសជាតិប្រដាល់សកលកម្ពុជា។ ជុំវិញការហ្វឹកហាត់កីឡាប្រដាល់សកលនេះដែរ គេថា បានពង្រឹងថែមទៀតនូវគុណភាពកណ្ដាប់ដៃ និងភាពរហ័សរហួន៕
