ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បាននាំយកថវិកាចំនួន៥០០០ដុល្លារ ដែលទទួលបានពីការរៀបចំទិវាពាក់កណ្ដាលម៉ារ៉ាតុងអន្តរជាតិភ្នំពេញឆ្នាំ ២០២៥ ប្រគល់ជូនដល់មូលនិធិគន្ធបុប្ផានៅព្រឹកថ្ងៃអង្គារ ទី១២ ខែឧសភា ឆ្នាំ ២០២៦ នៅក្រសួងសេដ្ឋកិច្ច និងហិរញ្ញវត្ថុ។
ពិធីប្រគល់ និងទទួលនេះមានការចូលរួមដោយលោកជំទាវ ប៉ែន សុបភា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោក ឃាន តួក ប្រធានផ្នែកទំនាក់ទំនងសាធារណៈនៃអង្គភាពប្រតិបត្តិមូលនិធិគន្ធបុប្ផាកម្ពុជា។
ឯកឧត្ដម វ៉ាត់ ចំរើន មានប្រសាសន៍ថា ដោយបានការអនុញ្ញាតដ៏ខ្ពង់ខ្ពស់ពីឯកឧត្ដមអគ្គបណ្ឌិសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលមូលនិធិគន្ធបុប្ផា គណៈកម្មាធិការជាតិអូឡាំពិកកម្ពុជាបានប្រគល់ជូនមូលនិធិដើម្បីរួមចំណែកក្នុងការជួយដល់សង្គម និងមន្ទីរពេទ្យគន្ធបុប្ផានាពេលនេះ។
ចំណែកលោកជំទាវ ប៉ែន សុបភា បានមានប្រសាសន៍ដ៏មានតម្លៃក្នុងការប្រមែប្រមូលនូវមូលនិធិនេះ និងបានអរគុណដល់គណៈកម្មាធិការជាតិអូឡាំពិកកម្ពុជាដែលបានរៀបចំកម្មវិធីជួយដល់មន្ទីរពេទ្យ ក៏ដូចជាជួយដល់សកម្មភាពសង្គមផ្សេងៗទៀត។ នេះជាសកម្មភាពដ៏សំខាន់ក្នុងការជំរុញឱ្យមានការជួយដល់មន្ទីរពេទ្យ ហើយលោកជំទាវក៏បានរាយការណ៍ពីការថមថយប្រមាណជាង៤០ភាគរយនូវការប្រមែប្រមូលមូលនិធិអំឡុងដើមឆ្នាំ២០២៦នេះ។
ឯកឧត្ដម វ៉ាត់ ចំរើន បានសង្កត់ធ្ងន់ដែរថា គោលការណ៍នៃការរៀបចំទិវារត់ប្រណាំងទាំងអស់ គឺត្រូវតែបង្កប់នូវគោលបំណងសប្បុរសធម៌ ហើយគណៈកម្មាធិការជាតិអូឡាំពិកកម្ពុជាដែលមាន ឯកឧត្ដមបណ្ឌិត ថោង ខុន ទេសរដ្ឋមតែងតែប្រកាន់ខ្ជាប់ និងខំប្រឹងប្រែងរហូតមក។
ឯកឧត្ដម វ៉ាត់ ចំរើន ក៏បានថ្លែងអំណរគុណដល់ឯកឧត្ដមអគ្គបណ្ឌិសភាចារ្យ អូន ព័ន្ធមុនីរ័ត្ន និងលោកជំទាវ ប៉ែន សុបភា ដែលបានផ្ដល់ឱកាសដល់គណៈកម្មាធិការជាតិអូឡាំពិកបានប្រគល់នូវថវិកាជូនមូលនិធិតាមបែបបទពិធីការប្រកបដោយភាពកក់ក្ដៅ៕
