ថ្មីៗនេះ កញ្ញា ហែម ថុនវិទិនី គ្រូបង្វឹកក្រុមជម្រើសជាតិកីឡាហែលទឹក ឆ្នាំ២០២៦ បានបញ្ចប់វគ្គសិក្សាបំប៉នសមត្ថភាពគ្រូបង្វឹកអន្តរជាតិ ICCEP Program (International Coaching Enrichment Certificate Program) បន្ទាប់ពីបានចូលរួមវគ្គសិក្សា និងវគ្គអនុវត្តផ្ទាល់នៅសហរដ្ឋអាមេរិក ការសិក្សាតាមប្រព័ន្ធអនឡាញ និងបានបញ្ចប់ការសិក្សានៅប្រទេសស្វីស ដោយជោគជ័យ និងទទួលបានសញ្ញាប័ត្រ ដែលទទួលស្គាល់ដោយសាកលវិទ្យាល័យ Delaware នៅសហរដ្ឋអាមេរិក និងគណៈកម្មាធិការអូឡាំពិកអន្តរជាតិ (IOC)។
អតីតកីឡាការិនីហែលទឹកឆ្នើមជម្រើសជាតិកម្ពុជា ក៏ត្រូវបានគណៈកម្មាធិការអូឡាំពិកអន្តរជាតិ (IOC) អញ្ជើញឱ្យចូលរួមចុះហត្ថលេខាលើជញ្ជាំងអូឡាំពិកនៅទីស្នាក់ការកណ្តាល IOC ក្នុងនាមជាអត្តពលិកអូឡាំពិក និងទទួលបានសញ្ញាបត្រអត្តពលិកអូឡាំពិក “Olympian” ដែលទទួលស្គាល់ដោយគណៈកម្មាធិការអូឡាំពិកអន្តរជាតិ (IOC)។
សម្រាប់វគ្គសិក្សាបំប៉នសមត្ថភាពគ្រូបង្វឹកអន្តរជាតិ ICCEP Program (International Coaching Enrichment Certificate Program) នេះ មានរយៈពេល ១០ខែ ដោយត្រូវចាប់សិក្សានៅសាកលវិទ្យាល័យ Delaware សហរដ្ឋអាមេរិក និងបញ្ចប់ការសិក្សានៅទីក្រុង Lausanne ប្រទេសស្វីស ដែលបានប្រព្រឹត្តទៅចាប់ពីថ្ងៃទី១៨ ដល់ថ្ងៃទី២៣ ខែមេសា ឆ្នាំ២០២៦ ។
គួបញ្ជាក់ផងដែរថា សម្រាប់វគ្គសិក្សាបំប៉នសមត្ថភាពគ្រូបង្វឹកអន្តរជាតិ កញ្ញា ហែម ថុនវិទិនី ទទួលបានការឧបត្តម្ភគាំទ្រពីគណៈកម្មាធិការជាតិអូឡាំពិកអន្តរជាតិ (IOC) តាមរយៈគណៈកម្មាធិការជាតិអូឡាំពិកកម្ពុជា(NOCC) ៕
