ប្រទេសម៉ាឡេស៊ីដែលជាម្ចាស់ផ្ទះព្រឹត្តិការណ៍កីឡាស៊ីហ្គេម ២០២៧ បាននិងកំពុងរៀបចំកិច្ចប្រជុំក្រុមប្រឹក្សាកីឡាអាស៊ីអាគ្នេយ៍លើកដំបូង ក្នុងឆ្នាំ២០២៦ដែលប្រព្រឹត្តទៅពីថ្ងៃទី៦ដល់ថ្ងៃទី៩ ខែមេសា ឆ្នាំ២០២៦ នៅក្រុង Selangor ប្រទេសម៉ាឡេស៊ី។
ជុំវិញកិច្ចប្រជុំដ៏សំខាន់ជាលើកដំបូងក្នុងឆ្នាំ២០២៦នេះ គណៈកម្មការ South East Asian Games Federation បានអញ្ជើញសមាជិកជំនាញទៅចូលរួមកិច្ចប្រជុំមានដូចជា សមាជិកក្រុម ប្រឹក្សាសហព័ន្ធកីឡាអាស៊ីអាគ្នេយ៍ “SEAGF Council Member", គណៈកម្មាធិការប្រតិបត្តិនៃសហព័ន្ធកីឡាអាស៊ីអាគ្នេយ៍ "SEAGF Executive Committee Meeting", គណៈកម្មការកីឡា និងបទប្បញ្ញត្តិ SEAGF Sports and Rules Committee Meeting, គណៈកម្មការវេជ្ជសាស្ត្រ “SEAGF Medical Committee Meeting”, គណៈកម្មការប្រឆាំងដូភីង "SEAGF Ant-Doping Committee Meeting", គណៈកម្មការស្ត្រី និងកីឡា “SEAGF Women and Sports Committee Meeting”, គណៈកម្មការអាជ្ញាកណ្ដាល "SEAGF Arbitration Panel Meeting”, គណៈកម្មការព័ត៌មាន និងផ្សព្វផ្សាយ "SEAGF Broadcasting Panel Meeting”។
ទន្ទឹមនឹងនេះ គណៈកម្មាធិការជាតិអូឡាំពិកកម្ពុជាបានបញ្ជូនមន្ត្រីជំនាញ៦រូបចូលរួមផងដែរដែលមានឯកឧត្ដម ញ៉ាន សុខវិសាល អគ្គលេខាធិការរង NOCC លោកជំទាវ កុយ ពិសី សមាជិកប្រតិបត្តិ ឯកឧត្ដមបណ្ឌិត សុខ សារឿន ប្រធានគណៈកម្មការវិជ្ជាសាស្ត្រ ឯកឧត្ដម ពេជ អង្គ ប្រធានផ្នែក លោក ខុន សុធា មន្ត្រីផ្នែក Doping និងលោក អន ចិន្ត្រាសំរិត អនុប្រធាននាយកដ្ឋានពហុកីឡា។
សូមជម្រាបជូនថា បើតាមគម្រោង ម៉ាឡេស៊ីនឹងទទួលរៀបចំព្រឹត្តិការណ៍កីឡាអាស៊ីអាគ្នេយ៍ លើកទី៣៤ ពីថ្ងៃទី១៨ដល់ថ្ងៃទី២៩ ខែកញ្ញា ឆ្នាំ២០២៧៕
