ដើម្បីបង្ហាញពីការមិនរើសអើង និងក្នុងនាមជាស្រ្តីដូចគ្នា ក្នុងឱកាសចូលឆ្នាំថ្មីប្រពៃណីជាតិ នៅថ្ងៃសៅរ៍ ទី៤ ខែមេសា ឆ្នាំ២០២៦ លោកជំទាវ កុយ ពិសី ប្រធានគណៈកម្មាធិការស្ត្រី និងកីឡានៃគណៈកម្មាធិការជាតិអូឡាំពិកកម្ពុជា និងក្រុមការងារ បាននិមន្តសម្តេចព្រះមហាអរិយវង្សបណ្ឌិត យ៉ន សេងយៀក ព្រះអនុប្រធានលេខាធិការដ្ឋានគណៈសង្ឃនាយក គណៈមហានិកាយនៃព្រះរាជាណាចក្រកម្ពុជា និងជាព្រះចៅអធិការវត្ត ឧណ្ណាលោម ទៅទេសនាអប់រំផ្លូវចិត្ត និងជួយតម្រង់ទិសដល់ស្រ្តីជាប់ឃុំ នៅមណ្ឌលអប់រំកែប្រែទី២ (ម២) ចំនួន ២០០ នាក់ និងបាននាំយកទៅជាមួយនូវសម្ភារៈកីឡា នំចំណីម្ហូបអាហារ សម្លៀកបំពាក់ សារុង ក្រមា សៀវភៅ ប៊ិច និងភេសជ្ជៈ។
ដោយឡែកស្រ្តីចំនួនជាង ១ ៣០០ នាក់ផ្សេងទៀត ទោះជាមិនបានជួបដោយផ្ទាល់ក្តី ក៏ទទួលបានផ្តល់ជូនតាមរយៈមណ្ឌលអប់រំកែប្រែនូវភេសជ្ជៈផ្អែម និងទឹកបរិសុទ្ឋមួយចំនួនផងដែរ។
ក្នុងពិធីសំណេះសំណាល ស្ត្រីមួយចំនួនបានឡើងថ្លែងអំណរគុណដល់មណ្ឌលកែប្រែដែលបានជួយឱ្យបានផ្លាស់ប្តូរពីក្មេងទំនើងមិនស្តាប់បង្គាប់ មកដឹងខុសត្រូវនៅក្នុងមណ្ឌលនេះ និងបានសន្យាចំពោះថា នឹងធ្វើជាពលរដ្ឋល្អ មិនសាងកំហុសឆ្គងដូចមុនទៀតឡើយ៕
