កីឡាករ-កីឡាការិនីចូលរួមការប្រកួតកីឡាទោចក្រយានជ្រើសរើសជើងឯកថ្នាក់ជាតិ ឆ្នាំ២០២៥ មានការកើនឡើងសិទ្ធផលគួរឲ្យកត់សម្គាល់ ក្រោយឆ្លងកាត់ការប្រកួតរយៈពេល ៣ថ្ងៃ ចាប់ពីថ្ងៃទី៦-៨ ខែកុម្ភៈ ឆ្នាំ២០២៦។
នេះបើតាមការបញ្ជាក់របស់លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា ក្រោយពិធីបិទការប្រកួតប្រចាំឆ្នាំ ដែលធ្វើឡើងក្រោមអធិបតីភាពឯកឧត្តម ប៉ាន សូរស័ក្តិ សមាជិករដ្ឋសភានៃកម្ពុជា និងជាប្រធានសហព័ន្ធ នៅពហុកីឡដ្ឋានជាតិមរតកតេជោ។
លោកថា ការប្រកួតឆ្នាំនេះ ទោះបីប្ដូរពីការរៀបចំតាមបណ្ដាខេត្តមករៀបចំនៅភ្នំពេញ ពោលគឺកង់ភ្នំ ប្រកួតនៅភ្នំបាសិត និងកង់គួក ប្រកួតនៅពហុកីឡដ្ឋានជាតិមរតកតេជោ តែកីឡាករ-កីឡាការិនី សប្បាយរីករាយក្នុងការចូលរួម និងបានកោតសរសើរ ចំពោះការរៀបចំបានយ៉ាងល្អ ជាមួយផ្លូវប្រណាំង ដែលមិនស្រួលពេក និងមិនពិបាកពេក។
កត្ដានេះ បានជំរុញឲ្យកីឡាករ-កីឡាការិនីចូលរួម មានការខំប្រឹងប្រកួតប្រជែង រហូតមានការបំបែកសិទ្ធផលចាស់របស់ខ្លួន។ ទន្ទឹមនឹងនោះ សហព័ន្ធក៏បានសម្លឹងឃើញធនធានកីឡាករយុវជនថ្មីៗ ដែលមានសមត្ថភាព និងទេពកោសល្យល្អជាច្រើន ស្ថិតក្នុងគោលដៅជ្រើសរើសប្រមូលផ្ដុំហ្វឹកហាត់បន្ថែមត្រៀមការប្រកួតអន្ដរជាតិនានាផងដែរ។
ក្នុងពិធីបិទការប្រកួតនោះដែរ ឯកឧត្តម ប៉ាន សូរស័ក្តិ បានកោតសរសើរ ចំពោះការចូលរួម និងការប្រកួតប្រជែង ក្រោមស្មាតីកីឡា ដែលជំរុញឲ្យជើងឯកថ្នាក់ជាតិឆ្នាំនេះ ប្រព្រឹត្តទៅដោយជោគជ័យ។ ឯកឧត្ដមសង្ឃឹមថា ទោះបីកីឡាមានឈ្នះ-ចាញ់ តែក្រោយបញ្ចប់ការប្រកួត ទាំងអ្នកទទួលបានជយលាភី និងពុំទាន់ទទួលបានមេដាយ នឹងបន្ដការខិតខំប្រឹងប្រែងហ្វឹកហាត់បន្ថែម ដើម្បីដុសខាត់សមត្ថភាពត្រៀមការប្រកួតនាពេលក្រោយៗទៀត។
យោងតាមរបាយគារណ៍គណៈកម្មការរៀបចំ ជើងឯកថ្នាក់ជាតិ ឆ្នាំ២០២៥ មានមន្ត្រីគណៈកម្មការបច្ចេកទេស ប្រតិភូ គ្រូបង្វឹក និងកីឡាករ-កីឡាការិនីចូលរួមសរុប ២២០នាក់ មកពី ១៤ក្លិប ។ ឆ្លងកាត់ការប្រកួតយ៉ាងស្វិតស្វាញសម្រាប់ជយលាភីលើវិញ្ញាសាទាំង៧ នៃការប្រកួតកង់ភ្នំ និងកង់គួក រួមមាន៖ វិញ្ញាសាកង់ភ្នំបុរស Men Elite MTB ចំណាត់ថ្នាក់លេខ១ កីឡាករ សាំង ពិសិដ្ឋ ក្លឹបក្រសួងមហាផ្ទៃ។ វិញ្ញាសាកង់ភ្នំបុរស Men Junior MTB លេខ១ កីឡាករ សាត រីដេវីត ក្លឹបគិរីរម្យ, វិញ្ញាសា កង់ភ្នំនារី Women MTB លេខ១ កីឡាការិនី ខេន ម៉ាឡៃ ក្លឹប Empire Cycling Team ខណៈវិញ្ញាសាកង់ភ្នំវ័យចំណាស់ លេខ១ កីឡាករ Pierre Yves Catry ក្លឹប Flying bikes។
ចំណែកផ្នែកកង់គួក វិញ្ញាសាបុរស អាយុ១៩ឆ្នាំឡើង Men Elite Road Criterium លេខ១ កីឡាករ សុខ ប៊ុនហុក Sakky Cycling Team, វិញ្ញាសាបុរស អាយុ១៨ឆ្នាំចុះក្រោម Men Junior Road Criterium លេខ១ កីឡាករ ង៉ោ ជាស្រ៊ុង ក្រុមកង់រិទ្ធិសែនកំពង់ឆ្នាំង ខណៈវិញ្ញាសាកង់គួកបុរស អាយុ៤០ឆ្នាំឡើង លេខ១ កីឡាករ ធុន ភារម្យ មកពី Sakky Cycling Team។ ក្រៅពីលេខ១ មេដាយមាស ក៏មានចំណាត់ថ្នាក់លេខ ២ ដល់លេខ ៥អមវិញ្ញាសាទាំង៧ ដូចៗគ្នាផងដែរ៕
